Մենք ՀՀ-ում ենք. այստեղ ոչինչ չի բացառվում. Սեյրան Օհանյան

Այսօր հրավիրված մամլո ասուլիսի ժամանակ ՕՐՕ դաշինքի ներկայացուցիչ Րաֆֆի Հովհաննիսյանը խոսեց ընտրություններից առաջ վարչական ռեսուրսի կիրառման մասին՝ դա համարելով աննախադեպ օրինախախտում. «Ընտրախախտումների, վարչական լծակի կիրառման մասին վկայում են տարիներ շարունակ իշխանության մեջ եղած իմ գործընկերները, որն արդյունք է բարձր քաղաքացիական գիտակցության: 

Րաֆֆի Հովհաննիսյանը պնդում է, որ ապրիլի 2-ին ամեն ինչ քաղաքացիների ձեռքում է, և դա լավ հասկանալով, իշխանությունները ճնշումներ են գործադրում հանձնաժողովի անդամների, ՕՐՕ֊ի կողմնակիցների վրա, ուստի, համաժողովրդական ճակատ ստեղծելու կարիք կա։

Սեյրան Օհանյանի համոզմամբ՝  ՕՐՕ դաշինքի նկատմամբ կա ուշադրություն, հեղինակության բարձրացման գործընթաց, ինչին հակառակ՝ բացասական դրսևորումներ են առկա: ՕՐՕ դաշինքի նկատմամբ հարվածներ են եղել, իսկ վերջին այդպիսի քայլը Սամվել Բաբայանի կալանավորումն էր: 

Պատասխանելով իր ձերբակալման մասին լուրերին՝  Սեյրան Օհանյանը նշեց. «Ինձ ասել են, որ նման լուրեր կան տարածված: Դրանք բոլորն ապատեղեկատվություններ են, իրավական ոլորտից ոչ ոք դրան չի անդրադարձել, բայց միևնույն ժամանակ՝ շեշտում եմ՝ մենք ՀՀ-ում ենք. այստեղ ոչինչ չի բացառվում»:

Դիտարկմանն՝  ինչպես է վերաբերում ՍերԺ Սարգսյանի վերջին հայտարարությունը, որ միայն ինքը կարող է Արցախի հարցը լուծել, Սեյրան Օհանյանը պատասխանեց. «Ոչ ոք չի կարող ասել, որ հայկական բանակը ինքն է կառուցել կամ զրոյից ձևավորել, ես հպարտանում եմ, որ երկար տարիներ եմ եղել բանակում և շարունակել իմ նախորդների սկսածը, բայց անփոխարինելի մարդիկ և համակարգեր չեն լինում»: 

Աղավնի Սուքիասյան