Ես ինքնաբացարկի դիմում չեմ ներկայացրել, սա ֆանտաստիկայի ժանրից է. Նապոլեոն Ազիզյան

Կենտրոնական ընտրական հանձնաժողովն այսօր հրապարակեց այն թեկնածուների ցուցակները, որոնք ինքնաբացարկի և մանդատից հրաժարվելու դիմումներ են ներկայացրել: Ցուցակում կա նաև «Ծառուկյան» դաշինքի անդամ Նապոլեոն Ազիզյանի անունը, որը 4 ընտրատարածքում այս դաշինքի հաղթած թեկնածուն է:

Նապոլեոն Ազիզյանը NewsBook-ի հետ զրույցում նկատեց, որ ֆանտաստիկայի ժանրից է այն, որ իր անունից ինքնաբացարկի դիմում է հայտնվել ԿԸՀ-ում:

«Ապրիլի 2-ից ես ոտքիս պատճառով տանը պառկած եմ ու տանից դուրս չեմ եկել, ու, բնականաբար, ես չէի կարող ինքնաբացարկի դիմում գրել: Բացի այդ, լրատվամիջոցներից մեկը մի քանի օր առաջ գրեց, որ հարցում է կատարել Կենտրոնական ընտրական հանձնաժողով, թե արդյոք մինչև ընտրությունները և դրանից հետո Նապոլեոն Ազիզյանի անունով ինքնաբացարկի դիմում եղե՞լ է, որտեղից էլ պատասխանել են, որ ոչ՛ ընտրություններից առաջ, ո՛չ էլ հետո իմ անունով դիմում չի ներկայացվել»,- մեզ հետ զրույցում ասել է նա:

Վերջինս փորձել է կապ հաստատել «Ծառուկյան» դաշինքի ներկայացուցիչների հետ, սակայն, նրա խոսքով, ոչ ոք հեռախոսազանգերին չի պատասխանում. «Ես զարմացած եմ, անակնկալի եկա՝ սա ի՞նչ է: Ես չեմ կարող ասել, թե ով է դրա հետևում կանգնած»:

Ազիզյանն ընդգծել է, որ օրենքի շրջանակներում ամեն բան անելու է ժողովրդի՝ իրեն տված քվեն պահպանելու համար:

Մանրամասները՝ ԱՅՍՏԵՂ: