Գործադուլ ու դասադուլ՝ Աշտարակում

Աշտարակ քաղաքի Վ.Պետրոսյանի անվան հիմնական դպրոցի մանկավարժական կոլեկտիվը, աշակերտները գործադուլ և դասադուլ են հայտարարել: Պատճառը շենքային անբարենպաստ պայմաններն են: Կոլեկտիվը դեռևս 2016 թվականին բաց նամակ էր հղել ԿԳՆ-ին՝ խնդրելով ուշադրության կենտրոնում պահել դպրոցի շենքային պայմանները, սակայն խնդիրն այնքան անարձագանք մնաց, որ հասավ գործադուլի, դասադուլի:

«Արագածոտնի մարզի «Աշտարակ քաղաքի Վ.Պետրոսյանի անվան հիմնական դպրոց» ՊՈԱԿ-ը հիմնադրվել է 1989 թ.-ին՝ 1962թ. կառուցված շենքում: 1990 թվականին դպրոցի մարզադահլիճը, նիստերի դահլիճը և ճաշարանը վթարային լինելու պատճառով ապամոնտաժվել են: Երկհարկանի մասնաշենքը մինչև 1997թ. բնակեցված է եղել փախստականներով. հիմա անմխիթար վիճակում է, հիմնանորոգման խիստ կարիք ունի և չի օգտագործվում:

Դասապրոցեսը կազմակերպվում է եռահարկ մասնաշենքում, որը նույնպես գտնվում է ծայրահեղ անմխիթար վիճակում և կարիք ունի հիմնանորոգման: Այն Աշտարակի խիտ բնակեցված մի շարք թաղամասերի միակ հիմնական դպրոցն է: 2016-2017 ուս-տարում դպրոցում կա շուրջ 600 աշակերտ, և փաստորեն ուսումնական գործընթացը հնարավոր չէ կազմակերպել:

Խնդիրն առկա է վաղուց. տարիներ շարունակ դիմել են պատկան մարմիններին, սակայն հարցին լուծում չի տրվել: Դպրոցն իր սուղ միջոցներով կազմակերպել է ուսումնական գործնթացը: Մասնավորապես, 2015-2016 ուս-տարում դասապրոցեսը կազմակերպելու համար դասասենյակներ են դարձվել դպրոցի կաթսայատունը, գրադարանը, փոքրիկ դահլիճը, շախմատի և ձեռարվեստի սենյակները: Այս ուսումնական տարում ավելացած 60 աշակերտների համար օգտագործվելու է ուսուցչանոցը, որը, փաստորեն, բավարար չէ ուսումնական գործընթացը պատշաճ կազմակերպելու համար: