«Հարսնաքարի» միջադեպի մանրամասները. Ռուբեն Հայրապետյանը հրահանգել է «դաստիարակել» բժիշկներին

Լուրեր.com-ին հայտնի է դարձել երեկ՝ հունիսի 17-ին, Ավան վարչական շրջանում գտնվող «Հարսնաքար» ռեստորանային համալիրում տեղի ունեցած միջադեպի մանրամասները։ Մեր աղբյուրների փոխանցմամբ՝ միջադեպի հետևանքով հիվանդանոց տեղափոխված ՀՀ ՊՆ Երևանի կայազորի հոսպիտալի Ուրոլոգիայի բաժնի պետ, մայոր Վահե Ավետյանն ու զինվորական բժիշկ Արտակ Բայադյանը երեկ սպորտային համազգեստով այցելել են «Հարսնաքար» ռեստորանային համալիր, սակայն անվտանգության աշխատակիցները թույլ չեն տվել նրանց ներս մտնել՝ պատճաշ հագնված չլինելու պատճառաբանությամբ: Զինվորական բժիշկները չեն առարկել և հեռացել են. նրանք զգեստափոխվել և կրկին վերադարձել են: Միջադեպը տեղի է ունեցել հաշիվը բերած մատուցողի և երիտասարդների միջև, ինչին միջամտել են անվտանգության աշխատակիցները:

Մեր աղբյուրները հայտնում են նաև, որ անվտանգության աշխատակիցները միջադեպի առնչությամբ հեռախոսակապ են հաստատել ԱԺ ՀՀԿ-ական պատգամավոր, «Հարսնաքար» ռեստորանային համալիրի սեփականատեր Ռուբեն Հայրապետյանի հետ, ով հրահանգել է «դաստիարակել» երիտասարդներին։ Որոշ լրատվամիջոցներով փորձ է կատարվում որակել միջադեպն իբրև ծեծկռտուք, այնինչ, ըստ մեր աղբյուրների, իրականում տուժածները միակողմանի ծեծի են ենթարկվել։

Հիշեցնենք, որ ինչպես ավելի վաղ հայտնել էր Lurer.com-ը, երեկ՝ 23:00-ին, «Հարսնաքար» ռեստորանում ՀՀ ԱԺ պատգամավոր Ռուբեն Հայրապետյանի անվտանգության աշխատակիցները նրա իսկ ցուցումով ծեծի էին ենթարկել ՀՀ ՊՆ Երևանի կայազորի հոսպիտալի Ուրոլոգիայի բաժնի պետ, մայոր Վահե Ավետյանին, որը տեղափոխվել էր Մուրացանի զինվորական հոսպիտալ և գիշերը ենթարկվել գանգուղեղի վիրահատության։