«Հարսնաքարում» ծեծված սպայի կյանքի փրկության համար բժիշկներն Աստված են կանչում

Վահե Ավետյանի առողջական վիճակը ծայրահեղ ծանր է գնահատվում: Որևէ դրական դինամիկա ընդհանուր վիճակում չկա: Այս մասին Լուրեր.com-ի հետ զրույցում ասաց «Մուրացան» զինվորական հոսպիտալի բժշկուհիներից մեկը, ով չցանկացավ ներկայանալ:

Բժշկուհին ասաց, որ Ավետյանին այսօր գիշերը նորից վիրահատել են, բայց նրա կյանքին շարունակում է վտանգ սպառնալ. «Վահե Ավետյանի կյանքի համար Աստված ենք կանչում: Մենք այնքան անպաշտպան ենք, որ մեր ընկերոջը չենք կարողանում օգնել: Ով այդպես դաժան ծեծել է նրան, առհասարակ մարդ կոչվելու իրավունք չունի: Ինչո՞ւ հասարակությունը որևէ գնահատական չի տալիս: Արդյոք մարդիկ մտածո՞ւմ են, որ եթե սպայի հետ կարող է նման բան լինել, մի՞թե հասարակ մահկանացուի հետ չի կարող պատահել ավելի վատը»:

Հիշեցնենք, որ նախորդ գիշերվա 23:00-ին՝ «Հարսնաքար» ռեստորանում ՀՀ ԱԺ պատգամավոր Ռուբեն Հայրապետյանի անվտանգության աշխատակիցները Ռուբեն Հայրապետյանի ցուցումով ծեծի են ենթարկել ՀՀ ՊՆ Երևանի կայազորի հոսպիտալի Ուրոլոգիայի բաժնի պետ, մայոր Վահե Ավետյանին, որին տեղափոխվել էին «Մուրացան» զինվորական հոսպիտալ։ Հոսպտալ էր տեղափոխվել նաև մեկ այլ տուժող՝ միկրովիրաբույժ Արտակ Բայադյանը:

Բժշկուհին մեզ հետ զրույցում նշեց նաև, որ չնայած այն հանգամանքին, որ Արտակ Բայադյանի առողջական վիճակը գնահատվում է ծանր, նրա կյանքին, այնուամենայնիվ, վտանգ չի սպառնում:

Անդրադառնալով նաև շրջանառվող լուրերին, որ ՊՆ կենտրոնական կլինիկական զինվորական հոսպիտալի անձնակազմը միջադեպի ժամանակ Վահե Ավետյանին դաժան ծեծի ենթարկելու հետ կապված որոշում է ընդունել գործադուլ հայտարարել, քանի դեռ Ավետյանին ծեծի ենթարկածներն ու նրանց հովանավոր բարձրաստիճան պաշտոնյաները չեն ենթարկվել պատասխանատվության՝ բժշկուհին ասաց, որ այդ մասին դեռևս տեղեկություն չի կարող տրամադրել: