«Հարսնաքարի» գործով կձերբակալվի 7-րդը. Վլադիմիր Գասպարյան

«Հարսնաքար» ռեստորանում տեղի ունեցած միջադեպի կապակցությամբ արդեն կա 6 ձերբակալված, իսկ 7-րդին ոստիկանությունը կձերբակալի առաջիկա 1-2 ժամվա ընթացքում: Այս մասին ՀՀ ոստիկանության զորքերի կազմավորման 20-ամյակի առիթով կազմակերպված շքերթից հետո լրագրողերի հետ զրույցում ասաց ՀՀ ոստիկանապետ Վլադիմիր Գասպարյանը:

Նրա խոսքերով 7-րդի նկատմամբ կասկածը հիմնավորված է: Մնացած հանգամանքները կպարզվեն նախաքննության ընթացքում: 

Անդրադառնալով այն հարցին, որ «Հարսնաքար» ռեստորանի սեփականատերն ԱԺ պատգամավոր Ռուբեն Հայրապետյանն է, Վլադիմիր Գասպարյանը նշեց, որ չի լինելու կանխակալ մոտեցում:

«Մենք գնում ենք երևույթների և ոչ անձերի հետևից, Ռուբեն Հայրապետյանն ընդամենը սեփականատերն է, բայց իմացեք, որ ցանկացած պարագայում ոստիկանությունը եթե որևէ մեղք տեսնի՝ անկախ զբաղեցրած պաշտոնից ու դիրքից տվյալ անձը օրենքի առջև պետք է պատասխան տա»,-ասաց նա։

Գասպարյանը նշեց, որ այս ամիսների ընթացքում ոստիկանությունն իր գործունեությամբ ապացուցել է, որ իրենց ուղղորդող չկա, իրենք «զոռբայություն» չեն ընդունում: 

«Զեկուցում եմ, որ ոստիկանությունն այս ամիսների ընթացքում իր գործունեությամբ ապացուցել է, որ հավատարիմ է իր կոչմանը»,- ասել է Գասպարյանը: