ՀՀ-ԵՄ համաձայնագրում Մեծամորի ատոմակայանը փակելու մասին որևէ ձևակերպում չկա. Կարեն Նազարյան

Հայաստանի Հանրապետության արտաքին գործերի նախարարի տեղակալ Կարեն Նազարյանը վստահեցնում է, որ Հայաստանի և Եվրոպական Միության միջև «Համապարփակ և ընդլայնված գործընկերության մասին» համաձայնագրում Մեծամորի ատոմակայանի փակվելու մասին որևէ ձևակերպում չկա: Ազգային ժողովում ՀՀ-ԵՄ համաձայնագիրը վավերացնելու մասին հարցի քննարկմանը, պատասխանելով Ազգային ժողովի փոխնախագահ Միքայել Մելքումյանի հարցին, Կարեն Նազարյանը վստահեցրեց, որ ատոմակայանի փակվելու մասին խոսք համաձայնագրում չկա՝ հավելելով, որ համաձայնագրի հրապարակումից հետո նման լուրերն անհիմն են շրջանառվել:

«Էներգետիկայի ոլորտում մենք Եվրամիության հետ պայմանավորվել ենք համագործակցել գործընկերության, փոխադարձ շահի, թափանցիկության և կանխատեսելիության սկզբունքների հիման վրա: Այդ համագործակցությունը, ի թիվս այլ հարցերի, պետք է ընդգրկի նաև Մեծամորի ատոմակայանի անվտանգ ապագործարկման համար ճանապարհային քարտեզի կամ գործողությունների պլանի վաղաժամկետ ընդունումը: Այսինքն՝ խոսքը ճանապարհային քարտեզի վաղաժամկետ ընդունման մասին է, ոչ թե ատոմակայանի փակման մասին»,- նշեց Նազարյանը:

Նա հավելեց, որ համաձայնագրով կողմերը պայմանավորվել են միջուկային անվտանգության հարցում համագործակցելիս հաշվի առնել ՀՀ առանձնահատկությունները, Ատոմային միջազգային գործակալության ստանդարտները, ԵՄ փորձը: «Համաձայնագրի շուրջ բանակցությունների ընթացքում ընկած էր այն իրողությունը, որ երաշխավորված հզորությունը դուրս հանելու միակ փոխարինողը կարող է լինել նույն երաշխավորված հզորությունը: Ընդ որում՝ ատոմակայանը նոր բլոկով փոխարինելը ոչ թե մեր ցանկությունն է, այլ Հայաստանի էներգետիկ զարգացման ռազմավարության հիմնական պահանջը»,- մանրամասնեց Նազարյանը:

Փոխնախարարը հավելեց, որ համաձայնագրի 42-րդ հոդվածում նշվում է նոր հզորությամբ ատոմակայանի բլոկի փոխարինման անհրաժեշտության, ինչպես նաև Հայաստանի էներգետիկ անվտանգության և կայուն զարգացման պայմանների ապահովման մասին: «Սա է ընկած հոդվածի հիմքում, ոչ թե համաձայնագրի ստորագրումից հետո ատոմակայանի փակումը: Համաձայնագրում այդպիսի դրույթ չկա»,- եզրափակեց Կարեն Նազարյանը: