Լիտվան պատրաստ է Հայաստանի բարեկամը լինել նաև ապագայում. Ինգրիդա Շիմոնիտե

Լիտվայի Հանրապետությունը ցանկանում է խորացնել Հայաստանի հետ երկկողմ հարաբերությունները, շարունակել օգտակար փորձի փոխանակումը տարբեր ոլորտներում և պատրաստ է լինել Հայաստանի բարեկամը՝ նաև ապագայում: Այս մասին հայտարարեց Լիտվայի Հանրապետության վարչապետ Ինգրիդա Շիմոնիտեն՝ ՀՀ վարչապետ Նիկոլ Փաշինյանի հետ համատեղ հայտարարության ժամանակ:

Նա վստահություն էլ հայտնել, որ Լիտվայի կառավարությունը Հայաստանի վարչապետի հետ միասին կգտնի հնարներ՝ երկկողմ հարաբերությունները սերտացնելու համար:

«Այս տարի տոնում ենք մեր դիվանագիտական հարաբերությունների հաստատման 30-ամյակը: Դիվանագիտական հարաբերությունների վերականգնման տարեդարձը նշում ենք մի շարք պետությունների հետ, սակայն, միայն մի քանի պետությունների ներկայացուցիչների հետ ենք հասցրել հանդիպել, և շատ ուրախ եմ, որ այս հանդիպումը տեղի է ունենում», - նշել է Լիտվայի վարչապետը:

Ինգրիդա Շիմոնիտեն նկատել է, որ ինչպես Հայաստանում տեղի ունեցած արտահերթ խորհրդարանական ընտրությունները ցույց տվեցին՝ Հայաստանում աջակցությունը ժողովրդավարությանը շատ ուժեղ է:

«Վարչապետը և նրա քաղաքական ուժը վիթխարի աջակցություն ստացան: Բարեփոխումների և ժողովրդավարական փոփոխությունները վիթխարի աջակցություն ստացան: Ես կարծում եմ, որ տեխնիկական գիտելիքի և փորձի ու լավագույն փորձի և լուծումների փոխանակումը, սխալներից քաղված դասերը և այլընտրանքների մասին տեղեկությունների փոխանակումը կարող են օգտակար լինել: Մենք երկար ուղի ենք անցել, մենք հարուստ փորձ ենք կուտակել ու այս փորձը փոխանակել ենք և շարունակելու ենք ապագայում ավելի ինտենսիվորեն փոխանակել», - ասել է նա:

Ինգրիդա Շիմոնիտեն նաև տեղեկացրել է, որ շուտով Երևանն ու Վիլնյուսը կկապակցվեն ուղիղ թռիչքներով, և դա երկու ժողովուրդներին թույլ կտա ավելի լավ ճանաչել միմյանց երկրները և շարունակել խորացնել երկկողմ հարաբերությունները:

Անդրադառնալով Լիտվայի և Հայաստանի, ինչպես նաև՝ այլ երկրների առջև ծառացած մարտահրավերներին՝ Լիտվայի վարչապետն առաջին հերթին առանձնացրեց կորոնավիրուսի համավարակը՝ նշելով, որ Լիտվան կորոնավիրուսի դեմ պայքարի շատ հաջող փորձ ունի և այդ հարցում աջակցություն է ցուցաբերում նաև Հայաստանին:

«Մեր բուժաշխատողները աջակցություն են ցուցաբերում Հայաստանին, մեր կառավարությունը երկու որոշում է կայացրել Հայաստանի ժողովրդին պատվաստանյութ նվիրաբերելու մասին: Հուսով եմ՝ մենք կկարողանանք աջակցել այս խնդրի հաղթահարման գործում, կօգնենք Հայաստանի կառավարությանը», - ընդգծել է Շիմոնիտեն՝ հայտնելով, որ Հայաստանի և Լիտվայի Առողջապահության նախարարությունների միջև ստորագրվել է համաձայնագիր COVID-19 համավարակի դեմ պայքարի վերաբերյալ:

Լիտվայի վարչապետը շնորհակալություն է հայտնել Հայաստանի կառավարությանը անօրինական միգրացիայի խնդիրներին անդրադառնալու համար.

«Հրատապ կարիքներից մեկը թարգմանիչների ապահովման անհրաժեշտությունն է: Թարգմանիչներ են անհրաժեշտ սահմանը ապօրինի հատող անձանց հետ հաղորդակցվելու համար, և Հայաստանը օգնեց մեզ՝ տրամադրելով կուրմանջի (քրդերեն, - խմբ.) լեզվի թարգմանիչներ: Մենք շատ բարձր ենք գնահատում այդ աջակցությունը»:

Ինգրիդա Շիմոնիտեի խոսքով՝ իր պաշտոնական այցի ընթացքում Հայաստանի վարչապետը կայցելի Լիտվայի որոշ պետական մարմիններ, որոնք կմասնակցեն Լիտվայի փորձը փոխանակելուն, մասնավորապես՝ թափոնների վերամշակման և այլ բնագավառներում:

Լիտվայի Հանրապետությունը, վարչապետ Շիմոնիտեի խոսքով՝ աջակցում է Եվրամիությանը Հայաստանի հետ փոխգործակցության խորացման, ինչպես նաև՝ տարածաշրջանային մարտահրավերների հաղթահարմանն ուղղված ջանքերում:

«Բոլորովին վերջերս Եվրամիության և Հայաստանի միջև ստորագրվեց Համապարփակ և ընդլայնված գործընկերության համաձայնագիրը, որի հիման վրա մի շարք բարեփոխումներ են իրականացվելու: Մենք հավատացած ենք, որ եվրոպական կառույցներն իրենց աջակցությամբ, իրենց մասնակցությամբ շատ կարևոր դեր են խաղում: Խաղաղության վերահաստատման և պահպանման մեխանիզմները նույնպես շատ կարևոր են: Մենք պատրաստ ենք Հայաստանի բարեկամը լինել նաև ապագայում», - եզրափակել է Լիտվայի վարչապետը:

Այս թեմայով Հայաստանի մի շարք հասցեներում էլեկտրաէներգիայի անջատումներ կլինեն Հայաստանի կանանց ֆուտբոլի ընտրանին պատմության երկրորդ անընդմեջ հաղթանակն է տոնել Պոլսո Հայոց պատրիարքարանն իր զորակցությունն է հայտնում Մայր Աթոռ Սուրբ Էջմիածնին Ձեր ծառայության այսօրվա հետևանքները կրելու են Հայաստանի ապագա սերունդները․ Դիվանագետների համահայկական խորհուրդ ՄԻՊ-ը խոստանում է հետևողական լինել աղետի գոտու բնակիչների բոլոր իրավունքների պատշաճ ապահովման հարցում (տեսանյութ) Հայաստանի իշխանությունները փոխանակ պատասխանեն Ադրբեջանին, փորձել են ճնշել սեփական ժողովրդին․ Սրբազան Հայաստանն իրավունք ունի փնտրելու այլ գործընկերներ, բայց տեսանելի ապագայում Ռուսաստանի հետ համագործակցությունն այլընտրանք չունի. Զատուլին Հայաստանի ազգային պատկերասրահում կցուցադրվի Բենվենուտո Տիզիի «Տիրամայրը մանկան հետ» կտավը Հայաստանի թիմը Կոսովոյում կխաղա ադրբեջանցիների հետ Վրաստանում «Մայդան» չի կարող լինել. Կոբախիձե