«ITEC ծրագիրը կարևոր հենասյուն է Հայաստանի և Հնդկաստանի միջև համագործակցության խորացման համար». Արթուր Մարտիրոսյան

ՀՀ կրթության, գիտության, մշակույթի և սպորտի նախարարի տեղակալ Արթուր Մարտիրոսյանը և ՀՀ-ում Հնդկաստանի Հանրապետության արտակարգ և լիազոր դեսպան Նիլակշի Սահա Սինհան մասնակցել են Հնդկաստանի տեխնիկական և տնտեսական համագործակցության (ITEC) օրվան նվիրված միջոցառմանը:

Այս տարի լրանում է ՀՏՏՀ ծրագրի (ITEC) 60-ամյակը. այն Հնդկաստանի արտաքին գործերի նախարարության կարողությունների զարգացման առաջատար հարթակն է, որը վերապատրաստել է շուրջ 160 երկրի ավելի քան 200000 պաշտոնյայի ինչպես քաղաքացիական, այնպես էլ պաշտպանական ոլորտում:

Հայաստանի Հանրապետության քաղաքացիները 1999 թվականից են մասնակցում ՀՏՏՀ (ITEC) ծրագրին. այս ընթացքում տարբեր մասնագիտությունների գծով ծրագրից օգտվել են շուրջ 400 հայ մասնակիցներ:

Ողջունելով ներկաներին՝ ԿԳՄՍ նախարարի տեղակալ Արթուր Մարտիրոսյանը կարևորել է Հնդկաստանի Հանրապետության հետ բարեկամական ու փոխշահավետ կապերի ամրապնդումն ու համագործակցային նոր հարաբերությունների կայացումը: Նրա խոսքով՝ ITEC ծրագիրը կարևոր հենասյուն է երկու երկրների միջև համագործակցության ընդլայնման և խորացման համար:

«2014 թվականից ի վեր Հնդկաստանը միջազգային կարողությունների զարգացման շուրջ 100000 դասընթացներ և կրթաթոշակներ է առաջարկել Հնդկաստանի առաջնակարգ հաստատություններում՝ ընձեռելով Հնդկաստանի մշակույթն ու հյուրընկալությունը զգալու հնարավորություն»,- նշել է Արթուր Մարտիրոսյանը:

Հնդկաստանի և Հայաստանի միջև դիվանագիտական հարաբերությունները հաստատվել են 1992 թվականի օգոստոսի 31-ից: Համագործակցությունն իրականացվում է մի շարք ստորագրված փաստաթղթերի շրջանակում, որոնց մի մասն ընդգրկում է հենց կրթության, գիտության, մշակույթի, սպորտի և երիտասարդական քաղաքականության իրականացման ոլորտները: Նախարարի տեղակալի խոսքով՝ ԿԳՄՍՆ համակարգման ոլորտներում հայ-հնդկական համագործակցությունն առավել տեսանելի է, մասնավորապես, բարձրագույն կրթության ոլորտում՝ ի դեմս Հնդկաստանի հազարավոր քաղաքացիների, որոնք բարձրագույն կրթություն են ստանում Հայաստանի բուհերում։

«Լիահույս ենք, որ այդ թիվը ժամանակի ընթացքում էլ ավելի կմեծանա: Հավատացած եմ՝ երկրների միջև համագործակցությունն ընդգրկում է նաև մարդկանց միջև բարի, ջերմ բարեկամական հարաբերությունների ձևավորումը: Կրթությունը, մշակույթն ու միջմշակութային հաղորդակցությունն են, որ միավորում են բարեկամ ժողովուրդներին և պետություններին»,- նշել է Արթուր Մարտիրոսյանն ու կարևորել ITEC-ի շրջանավարտների ներդրումը մեր երկրի հանրային կյանքում:

ԿԳՄՍ նախարարի տեղակալը փաստել է՝ ITEC-ի շրջանավարտները կամուրջ են հանդիսանում երկու բարեկամ երկրների միջև՝ երկկողմ հարաբերությունների սերտացման գործում:

ՀՀ-ում Հնդկաստանի Հանրապետության արտակարգ և լիազոր դեսպան Նիլակշի Սահա Սինհան ուրախությամբ փաստել է՝ ՀՏՏՀ շրջանավարտներն այսօր կարևոր դիրքեր են զբաղեցնում Հայաստանում: Ամեն տարի Հայաստանին առաջարկվում է 40 տեղ: Այդուհանդերձ, վերջին մի քանի տարիների ընթացքում նկատվել է գրանցման անկում. դեսպանը հայ մասնագետներին կոչ է արել օգտվել այս հնարավորությունից. «Այցելելով մեր երկիր՝ դուք դառնում եք մեր մեծ ընտանիքի և Հնդկաստան կոչվող խճանկարի մի մասը: Դուք մեր դեսպաններն եք, որպեսզի աշխարհն իմանա իրական Հնդկաստանի պատմությունը: Հնդկաստանը միշտ հավատացել է իր գիտելիքների և փորձի փոխանակմանը բոլոր ոլորտներում, քանի որ մենք անկեղծորեն հավատում ենք, որ մարդու գիտելիքներն աճում են միայն այն ժամանակ, երբ դրանցով կիսվում են»,- նշել է Նիլակշի Սահա Սինհան:

Տեղեկացնենք՝ ՀՏՏՀ շրջանակում հասանելի դասընթացների վերաբերյալ տեղեկատվությունը կարելի է գտնել դեսպանատան կայքում:

Այս թեմայով Հայաստանի և Չեխիայի ԱԳ նախարարները մտքեր են փոխանակել տարածաշրջանային թեմաների շուրջ Գոհ եմ Հայաստանի և Ադրբեջանի միջև «խաղաղության գործընթացի» առաջմղումից․ Էրդողան Ալիևը հայտարարել է, որ Հայաստանի հետ խաղաղության օրակարգն առաջ մղելու համար բարենպաստ պայմաններ կան Փաշինյանի գլխավորությամբ շարունակվել են Հայաստանի ժողովրդագրական ռազմավարության նախագծի շուրջ քննարկումները Բրյուսելում Հայաստանի դեսպանը հանդիպել է Բելգիայի ընտրություններին առաջադրված հայ թեկնածուների հետ Իրանում երկիրը կառավարելու համար 6 հատուկ կոմիտե է ստեղծվել Թուրքիան Իրան է ուղարկել ավելի քան 30 լեռնագնացից բաղկացած որոնողափրկարարական թիմ Հնդկաստանը աղոթում է Ռաիսիի բարօրության համար. վարչապետ Մոդի Իրանի զինված ուժերի գլխավոր շտաբի պետը կարգադրել է բոլոր ուժերն օգտագործել Ռաիսիի ուղղաթիռի որոնման համար Չպետք է թույլ տանք Հայաստանում թուրքական կուսակցություն բացվի. սպառնալիք` ՀՀ անվտանգությանը. Արթուր Չախոյան (տեսանյութ)