Արտահերթ ընտրություններից առաջ Փաշինյանը սատելիտ ընդդիմադիր ուժերի դերաբաշխում է սկսել

«Գեոպոլիտիկա» տելեգրամյան ալիքն օրեր առաջ գրել էր, որ իրենց տեղեկություններով՝ Արևմուտքի կողմից Նիկոլ Փաշինյանին պահանջ է ներկայացվել՝ հնարավորինս շուտ գնալ արտահերթ ընտրությունների և կոալիցիա կազմել արևմտամետ քաղաքական ուժի հետ։ Մյուս կողմից՝ վերջին ամիսներին անցկացված բոլոր սոցհարցումները գալիս են փաստելու, որ Նիկոլ Փաշինյանը և իշխող թիմը սրընթաց կերպով կորցնում են վարկանիշը և արտահերթ ընտրությունների դեպքում դժվար թե կարողանան հասնել ցանկալի արդյունքի: Եվ հենց դա է պատճառը, որ Փաշինյանի գլխավոր նպատակներից մեկն այս պահին բուտաֆորիկ ընդդիմադիր դաշտի ձևավորումն է, որը երկու խնդիր կարող է լուծել՝ ձայներ գողանալ իրական ընդդիմադիր ուժերից և այնուհետև այդ ձայները սկուտեղի վրա մատուցել Նիկոլ Փաշինյանին:

Դիցուք՝ երեկ Արցախի Անվտանգության խորհրդի նախկին քարտուղար Սամվել Բաբայանը հանդես էր եկել ուշագրավ հայտարարությամբ: Ըստ նրա՝ մեր խորհրդարանը չի արտացոլում հասարակության կարծիքը, հետևաբար պետք է օր առաջ գնալ նոր ընտրությունների: Միևնույն ժամանակ Բաբայանը նշում է, որ Արցախի հարցը չի փակվել և նույնիսկ այդ հարցի լուծման ծրագրեր է առաջ քաշում: Բաբայանն օրինակ առաջարկում է Ադրբեջանին տալ ճանապարհ, փոխարենը՝ Ադրբեջանը պետք է «վերադարձնի Ղարաբաղը»։ Բաբայանի ծրագրերը, որ նա հնչեցնում էր 2023 թվականին՝ Արցախում գտնվելու ընթացքում, բնականաբար, ստեղծված պայմաններում իրագործելի չեն: Սակայն, դա չի բացառում այն, որ Փաշինյանը կփորձի Բաբայանի միջոցով մոբիլիզացնել արցախահայ էլեկտորատը, նրանց հույս ներշնչել, որ Արցախի հարցը դեռևս փակված չէ և կան հայրենիք վերադառնալու շանսեր: Արդյունքում՝ նրանք խաբվելով իրենց ձայները կտան Բաբայանին, իսկ վերջինս էլ դրանք կմատուցի Նիկոլ Փաշինյանին: 

Հանրության՝ ընդդիմադիր հայացքներ ունեցող տարբեր սեգմենտների սիրտը շահելու նպատակով Փաշինյանը կարող է խաղադաշտ մտցնել նաև այլ խաղացողների: Օրինակ՝ պատահակա՞ն էր արդյոք, որ Փաշինյանի հատուկ հանձնարարություններով արդեն նախկին դեսպան Էդմոն Մարուքյանը հրաժարականի դիմում է ներկայացնում հենց հիմա, երբ ակտիվորեն խոսվում է հնարավոր արտահերթ ընտրությունների մասին: Ավելին՝ Մարուքյանը, ով ձայն չհանեց այն ժամանակ, երբ Փաշինյանը խայտառակ կապիտուլյացիա էր ստորագրում, երբ աչք էր փակում ՀՀ սուվերեն տարածքի մի մասի օկուպացիայի և Արցախում էթնիկ զտումների վրա, հանկարծ հայտարարում է, որ դեմ է Փաշինյանի առաջ քաշած նոր Սահմանադրություն գրելու, Անկախության հռչակագրից և Արարատից հրաժարվելու գաղափարին: Կա տպավորություն, որ Մարուքյանի ընդդիմադիր ամպլուա վերադառնալը նպատակ է հետապնդում ստանալ հանրության այն սեգմենտի քվեն, որը կտրականապես դեմ է նոր Սահմանադրությունում առաջ քաշվող փոփոխություններին: Միևնույն ժամանակ, չկա որևէ երաշխիք, որ Մարուքյանի ստացած ձայները հետագայում չեն հանգրվանի Փաշինյանի գրպանում:

Նույնը կարելի է ասել նաև Էդգար Ղազարյանի և Կարին Տոնոյանի մասին, ովքեր արդեն մեկ անգամ հաջողել են ջրել քաղաքացիների բողոքի ալիքը: Նրանց միջոցով Փաշինյանը կարող է ստանալ առավել ռադիկալ և չհամակերպվող սեգմենտի քվեն: Չի բացառվում, որ Փաշինյանի խաղաքարտերի մեջ լինեն նաև այնպիսի ուժեր և անհատներ, որոնց միջոցով հնարավոր կլինի ստանալ նաև անհայտ կորած, զոհված կամ գերության մեջ գտնվող զինծառայողների հարազատների քվեն:

Ի տարբերություն իրական ընդդիմադիր դաշտի, որը այս պահի դրությամբ, կարծես թե, թմբիրի մեջ է և չի ցանկանում կամ ի վիճակի չէ մոբիլիզացնել հանրությանը, պայքարի նոր և գործնական քայլեր գեներացնել, Փաշինյանն իր գործը լավ է  կատարում՝ բզկտելով ընդդիմադիր դաշտը և պսեվդո-ընդդիմադիր ուժերին օրակարգ բերելու միջոցով իր համար անհրաժեշտ պատկեր ստեղծելով: Սակայն, Փաշինյանի այս սցենարը կարող է հօդս ցնդել այլընտրանքային, իրական ընդդիմադիր ուժի կամ ուժերի ձևավորման պարագայում: Երրորդ ուժը, որը որևէ առնչություն չի ունենա ո՛չ նախկինների, ո՛չ ներկաների հետ և որը ի վիճակի կլինի նոր դեմքերի և նոր գաղափարների շուրջ մոբիլիզացնել հանրության մեծամասնությանը, կարող է ի չիք դարձնել Փաշինյանի և նրա սատելիտ ընդդիմադիր ուժերի բոլոր նման ծրագրերը:

Այս թեմայով Նիկոլ Փաշինյանը Սփյուռքի գործերի հանձնակատարներ է նշանակել Այս ջրհեղեղի հետևանքով նոր պետք է անդրադառնանք ճանապարհաշինական ստանդարտներին. Փաշինյան (տեսանյութ) Կղերաֆեոդալական համակարգը բունտ է անում հիմա. Փաշինյան (տեսանյութ) Սահմանազատված հատվածներում ապահովված է անվտանգության հնարավոր ամենաբարձր երաշխիքը. Փաշինյան (տեսանյութ) Եթե հարկ լինի` Կիրանցում նոր դպրոց կկառուցենք, ծնողների հետ կքննարկենք անվտանգության հարցը․ Փաշինյան (տեսանյութ) Դուրս եմ եկել Փաշինյան-Ալիև դուետի դեմ. վերստին ասում եմ՝ Ալիև՛, գլուխդ պատին ես տվել. Սրբազան (տեսանյութ) Նիկոլ Փաշինյանն անդրադարձել է կաթողիկոսի հետ կապված միջադեպին (տեսանյութ) Էդ էլիտաները իրենց «Բրաբուսներով» պատերազմների ժամանակ էլ, խաղաղության ժամանակ էլ չեն տառապում․ Փաշինյան (տեսանյութ) Ուրիշ հերոս չգիտե՞ս. Միքայել Սրբազանը՝ Նիկոլ Փաշինյանին (տեսանյութ) Նիկոլ Փաշինյանը Լոռու եւ Տավուշի մարզերում արտակարգ իրավիճակի կառավարման օպերատիվ շտաբի նիստ է անցկացրել