Ձմեռ Պապին հին տոմարով Նոր տարվանը մեզի դոմիկ կբերի
Արտակարգ ՊատահարԱրարատի մարզի Մասիս քաղաքի Մասիս գծային մեքենայացված կայարանի 207 վագոն-հանրակացարանի բնակիչները հունվարի 2-ից բնակվում են ոչ թե իրենց կացարանում, այլ հարևան վագոն-տնակներում:
Ինչպես հայտնում է shamshyan.com-ը, հունվարի 2-ին` ժամը 20:30-ի սահմաններում, դեռևս անհայտ պայմաններում, հրդեհ է բռնկվել նշված վագոն-տնակում:
Փրկարարներն ու տեղի բնակիչները 2 ժամից ավելի պայքարել են կրակի դեմ, սակայն կարողացել են միայն կանխել կրակի հետագա տարածումը այլ վագոն-տնակներ: Ամբողջովին մոխրակույտի է վերածվել 54-ամյա Կարինե Բարսեղյանի վագոն-տնակը, որտեղ բնակվում էին ընտանիքի 4 անդամներ, այդ թվում` անչափահաս աղջիկը` Լուսինե Ավագյանը, ով սովորում է Մասիս քաղաքի թիվ 6 դպրոցի 8-րդ դասարանում:
Ֆոտոլրագրողի հետ զրույցում բնակիչները արդարացիորեն բողոքում էին, որ եթե հարևանի տղան այդ պահին, ցախ կոտրելու նպատակով, դուրս չգար իրենց կիսախարխուլ վագոն-տնակից, չէին իմանա առաջացած հրդեհի մասին: Կ. Բարսեղյանը այդ վագոն-տնակում բնակվում է 28 տարի, իսկ այդ կիսաավերակ, քարե դար հիշեցնող հանրակացարանային ավանում բնակվում են 30-ից ավելի մարդիկ, այդ թվում` անչափահասներ և մեծահասակներ:
Այս պահին Կարինեի ընտանիքը մնացել է բաց երկնքի տակ, սակայն այստեղ էլ նրանց օգնում են բավականին վտանգավոր պայմաններում բնակվող հարևանները` Լուսաբեր Ավետիսյանն ու Ավետիք Խնկոյանը: Նրանք բնակվում են օրը մեկի տանը:
Ֆոտոլրագրողը հայտնում է, որ պայմաններն անտանելի են, չկան անգամ կոմունալ անհրաժեշտ պայմաններ. ջուր ու սանհանգույց ընդհանրապես չկա:
Տեղի ունեցածի մասին բնակիչներն ահազանգել են Մասիսի քաղաքապետարան, որտեղից հայտնել են, որ հանգստյան օրերի ավարտից հետո իրենք կձեռնարկեն ինչ-որ բաներ, սակայն կոնկրետ ինչ, քաղաքապետարանից հստակություն չեն մտցրել:
Այսօր ֆոտոլրագրողը զրուցել է Արարատի մարզպետ Էդիկ Բարսեղյանի հետ, ով հայտնել է, որ տեղյակ է կատարվածին և խոստացել է մեկ շաբաթվա ընթացքում լուծել նրանց վագոն-տնակի հարցը: Առաջիկայում կլուծվի նաև ջրի և էլեկտարէներգիայի խնդիրը:
«Մեր հույսը մարզպետն ու հանրապետության նախագահն են»,- նշում էին նրանք, իսկ անչափահասները հավատալով ամանորյա տոներին` ասում էին. «Ձմեռ Պապին հին տոմարով Նոր տարվանը մեզի դոմիկ կբերի»: