Նիկոլ Փաշինյան. Այդ երբվանի՞ց է ՀՀ ոստիկանության պետը պատգամավորների հետ խոսում «արա»-ով

Ազգային ժողովի այսօրվա նիստում ԱԺ ՀԱԿ խմբակցության պատգամավոր Նիկոլ Փաշինյանը հետևյալ հարցերն ուղղեց ՀՀ Ոստիկանության պետի տեղակալ Արթուր Օսիկյանին.

«Պարո՛ն Օսիկյան, վերջին օրերին շատ լայնորեն լուսաբանվում էր այն հարցը, թե ինչպես էր ոստիկանության պետը հայտարարում, որ Գյումրիի դեպքերի հետ կապված ԱԺ պատգամավորներ են զանգահարել իր տեղակալներին և ինչ-որ հարցերով դիմել։ Առաջին հարցը հետևյալն է. արդյոք դու եք այդ տեղակալը, որին զանգել են և ովքեր են եղել զանգահարողները։ 

Երկրորդ հարցս հետևյալն է. Ոստիկանությունն իրեն թույլ է տվել այսպիսի արտահայտություն. «Դուք պատգամավո՞ր եք, թե՞ գողական, արա՛»։ Հարցս հետևյալն է՝ այդ երբվանի՞ց է ՀՀ ոստիկանության պետը պատգամավորների հետ խոսում «արա»-ով։ Ես սա հատուկ եմ շեշտում, որովհետև, եթե նա շեշտեր անուն ազգանունը դա կլիներ ուրիշ իրավիճակ, բայց եթե նա չի շեշտում անուն-ազգանունը, նա «արա»-ով դիմում է կարգավիճակին, այսինքն՝ ԱԺ պատգամավորներին։ Ես խնդրում եմ, որ Դուք ոստիկանության պետին, Ձեր ղեկավարին փոխանցեք՝ եթե հաջորդ անգամ ինքը կխոսի կարգավիճակի մասին, այդպիսի տոնով՝ «արա»-ով, կարող եք ասել, որ ԱԺ պատգամավոր Փաշինյանն ասաց, որ ինքը նույնպիսի արայով պատասխան կտա ոստիկանապետին և ընդհանրապես ցանկացած մեկին։ Եթե կա «արա» ու գողական Ազգային ժողովում, թող ոստիկանապետը բարի լինի այդ անունները հրապարակել, որպեսզի բոլորին ամեն ինչ պարզ լինի։ Հակառակ դեպքում, եթե նման ոճը կրկնվի և այդպիսի ասելիքը տարածվի կարգավիճակի վրա, կրկնում եմ՝ ես ինքս պարտավորվում եմ ոստիկանապետին արժանացնել համարժեք պատասխանի»։

ՀԱԿ պատգամավորի հարցերին Օսիկյանը պատասխանեց շատ կարճ։ Միայն նշեց, որ այն տեղակալը, որի մասին խոսվում է, ինքը չէ։

«Ես ցանկություն չունեմ Ձեզ պատասխանելու, բայց նշեմ առաջին հարցի հետ կապված՝ ո՛չ, ինձ չեն զանգահարել, չգիտեմ ում մասին է խոսքը, և երկրորդը՝ կոչ եմ անում նաև կոռեկտության սահմաններն ամեն դեպքում պահպանել»,-ասաց Օսիկյանը։

Վերջինիս արձագանքեց Փաշինյանը՝ ասելով. «Կարծում եմ՝ դուք այստեղ կոռեկտության կոչ անելու որևէ հիմք չունեիք, և հույս ունեմ, որ դուք կոռեկտության իմ կոչը կփոխանցեք Ձեր ղեկավարին»։