Բժիշկը պատմել է, թե ինչպես կարելի է բարձրացնել տղամարդկանց ֆերտիլությունը

Բրիտանացի բժիշկ Ռոբ Գալոուեյն ասել է, որ մարմնի նորմալ քաշի պահպանումը, կանոնավոր վարժությունները, հավասարակշռված սննդակարգը և ձկան յուղի ընդունումը բարձրացնում են տղամարդկանց ֆերտիլությունը։ Այս մասին հայտնում է Daily Mail-ը։

Բժիշկը պարզաբանել է, որ առողջ քաշի պահպանումը դրական է ազդում սերմի որակի վրա։ Դանիացի գիտնականների կողմից անցկացված ուսումնասիրությունը ցույց է տվել, որ ճարպակալած տղամարդկանց մոտ, ովքեր հետագայում նիհարել են ութշաբաթյա դիետայի հետևանքով, սերմնահեղուկում սպերմատոզոիդների քանակն ավելացել է գրեթե 50 տոկոսով:

Գալոուեյը նաև ընդգծել է կանոնավոր վարժությունների կարևորությունը տղամարդու ֆերտիլությունը բարելավելու համար: Համաձայն մեկ այլ հետազոտության, որը հրապարակվել է Reproduction ամսագրում 2015 թվականին, սրտանոթային (սրտանոթային ֆունկցիան բարելավելու համար վարժություններ) և ուժային (մկանային ուժը զարգացնելու վարժություններ) մարզումների համադրությունը կարող է 21%-ով ավելացնել սպերմատոզոիդների քանակությունը սերմնահեղուկում։ Այնուամենայնիվ, պետք է խուսափել հեծանվավազքից: 

Բժիշկը հավելել է, որ տղամարդիկ պետք է ավելի շատ այնպիսի մթերքներ օգտագործեն, որոնք նվազեցնում են օրգանիզմում օքսիդատիվ սթրեսի ինտենսիվությունը։  Նման մթերքներից է ընկույզը:

Բացի այդ, որոշ սննդային հավելումներ կարող են օգնել բարելավել սերմի որակը: Որոշ ուսումնասիրությունների համաձայն՝ ձկան յուղի ընդունումը կարող է բարելավել սպերմատոզոիդների շարժունակությունը: