Կուտակային կենսաթոշակների հարցով դատաքննության դիմող կողմը հանդես եկավ եզրափակիչ ելույթներով
ՏնտեսությունՍահմանադրական դատարանում մարտի 31-ին «Կուտակային կենսաթոշակների մասին» օրենքի մի շարք դրույթների սահմանադրականության վերաբերյալ ընթացող դատաքննությանը դիմող կողմի ներկայացուցիչները ներկայացրին իրենց փաստարկները՝ որոշ դրույթների հակասահմանադրականության և խտրականության դրսևորումներ պարունակելու մասին:
Դիմող կողմի ներկայացուցիչ, փաստաբան Մերի Խաչատրյանի մեկնաբանմամբ՝ օրենքում առկա են խտրականության դրսևորումներ տարիքային և եկամտային հիմքերով: Փաստաբանն ուշադրություն հրավիրեց այն հանգամանքի վրա, որ գյուղատնտեսությամբ զբաղվողները չեն մասնակցում համակարգին, ինչպես նաև չի խրախուսվում կամավոր վճար կատարելը: Խաչատրյանը ներկայացրեց միջազգային դատական պրակտիկայում առկա նորմերն ու որոշումները, որոնց, նրա ներկայացմամբ, չեն համապատասխանում «Կուտակային կենսաթոշակների մասին» օրենքի մի շարք դրույթներ: «Պարտադիր կուտակային վճար կատարողների շրջանակը և տարիքը սահմանելիս օրենքը հակասության մեջ է մտնում Հայաստանի Հանրապետության Սահմանադրության 3, 6, 14.1 հոդվածերի հետ»,-նշեց Խաչատրյանը:
Դիմող կողմի ներկայացուցիչ, ՀՀ Ազգային Ժողովի պատգամավոր Արծվիկ Մինասյանը ներկայացրեց փաստարկներ կուտակային կենսաթոշակային համակարգի ներդրման դեմ՝ շեշտադրելով սոցիալական ոլորտի տարրերը: Մինասյանը ներկայացրեց ոլորտում միջազգային փորձը, համակարգի ներդրման հնարավոր վտանգները: «Պարտադիր կուտակային բաղադրիչը, մեր խորին համոզմամբ, հակասում է Սահմանադրության հիմնարար արժեքներին»,-նշեց Մինասյանը: Ելույթ ունեցավ նաև դիմող կողմի ներկայացուցիչ, իրավապաշտպան Արտակ Զեյնալյանը: Խոսքը տրվեց պատասխանող կողմի ներկայացուցիչներին` ի դեմս ՀՀ ԱԺ պատգամավոր Հակոբ Հակոբյանի:
ՀՀ Սահմանադրական դատարանում մարտի 31-ին շարունակում է «Կուտակային կենսաթոշակների մասին» ՀՀ օրենքի 5, 7, 8, 37, 38, 45, 49 և 86-րդ հոդվածների սահմանադրականության վերաբերյալ» գործի դատաքննությունը: Այսօր որպես պատասխանող կողմ հանդես են գալիս ՀՀ կառավարության ու Կենտրոնական բանկի ներկայացուցիչները: Դիմող կողմի ներկայացուցիչներն են ՀՀ ԱԺ պատգամավոր Արծվիկ Մինասյանը, փաստաբան Մերի Խաչատրյանը և իրավապաշտպան Արտակ Զեյնալյանը:
Դատաքննության առաջին փուլն անցկացվեց մարտի 28-ին, որտեղ որպես պատասխանող կողմ էր ներգրավված ՀՀ Ազգային Ժողովը՝ ի դեմ ԱԺ պատգամավոր Հակոբ Հակոբյանի:
Հանրապետությունում հունվարի 1-ից գործարկվում է կենսաթոշակային պարտադիր կուտակային համակարգը, ըստ որի' 1974 թվականից հետո ծնված քաղաքացիները կկատարեն 5 տոկոսի չափով պարտադիր վճարումներ' կուտակային հիմնադրամներին: Կենսաթոշակային համակարգի մասնակիցների գումարները կառավարվելու են ֆոնդի կառավարիչների միջոցով: