Հալեպում ջրի և էլեկտրականության պակասը փոքր-ինչ մեղմվել է
ՍփյուռքՀալեպում ջրի և էլեկտրականության տագնապը փոքր-ինչ թեթևացել է: Այս մասին «Արմենպրես»-ին տեղեկացրել է գործակալության Հալեպի աղբյուրը՝ ավելացնելով, որ ջրի տագնապ թեև կա, սակայն երբեմն որոշ թաղամասերում լինում է, որոշներում՝ ոչ: Աղբյուրը նաև նշել է, որ ջրի առևտուրը դարձել է ընդհանրական երևույթ: Ինչ վերաբերում է էլեկտրականությանը, Հալեպում կան մարդիկ, որ հսկայական գեներատորներ են գնել և բարձր գներով վաճառում են հոսանքը: Որոշ մարդիկ ստիպված գնում են հոսանքը, չնայած որ հեռուստացույց և սառնարան աշխատեցնելու համար շաբաթական բավական մեծ գումար է կազմում:
Աղբյուրը նաև տեղեկացրել է, որ բանակը 2 օրվա ընթացքում առաջխաղացում է գրանցել՝ իր հսկողության տակ վերցնելով Շեյխ Նաջար շրջանը, որը գործարանային թաղամաս է համարվում:
«Բերիո լուրեր» ֆեյսբուքյան էջից տեղեկացանք, որ ջրի եթե սուր պակասից Հալեպը տառապում է վերջին մեկ ամսվա ընթացքում, ապա էլեկտրականության տագնապը պատերազմի առաջին օրերից մնում է գերակշռող: Ամռան շոգ եղանակին օրվա ընթացքում էլեկտրականությունը մի քանի ժամ է լինում, իսկ որոշ թաղամասերում այն ամբողջովին անջատված է: Էլեկտրականության միանալուն պես հալեպցիներն անմիջապես գործի են անցնում՝ լվացք, լոգանք, էլեկտրականությամբ ջուր մատակակարող գործիք են աշխատեցնում, լիցքավորում են բջջային հեռախոսները: «Այսպիսով՝ կարելի է նշել, որ էլեկտրականության մի քանի ժամվա առկայությունը փոքր-ինչ բարձրացնում է հալեպցիների տրամադրությունը»,- նշված է ֆեյսբուքյան էջում: