Ֆրանսիական խայտառակություն. ինչպես են ֆրանսիացի ոստիկանները, բռնություն գործադրելով, վտարում հայ ընտանիքին (բացառիկ տեսանյութ)
ՀասարակությունԻնչպես Lurer.com-ին տեղեկացրեց Europe Armenia Group-ի տնօրեն Արման Ավագյանը, Ֆրանսիայի Նանսի քաղաքում արտառոց դեպք է տեղի ունեցել հայ ընտանիքի հետ:
«Կրթություն առանց սահմանների» կազմակերպությունը տարածել է մի տեսանյութ, որտեղ երևում է, թե ինչպես են հայ ընտանիքին բռնի ուժով արտաքսում ապաստարանից:
Ըստ «Կրթություն առանց սահմանների» կազմակերպության տարածած տեղեկության՝ օգոստոսի 5-ին՝ առավոտյան ժամը 6-ին, առաջինը ընտանիքի հորն են բերման ենթարկել ոստիկանության բաժին և կալանավորել, այնուհետև, մեկ ժամ անց, ոստիկանները եկել են ձերբակալելու ընտանիքի մնացած անդամներին՝ կնոջը և երկու երեխաներին՝ 7 տարեկան և 8 ամսական, այնինչ Ֆրանսիայի նախագահը խոստացել էր, որ երեխաներին այլևս բերման չեն ենթարկի:
Տեսանյութում ակնհայտ երևում է նաև երեխաների նկատմամբ կոպիտ վերաբերմունքի դրսևորումը:
Չնայած նրան, որ փաստաբանը դատարանում առարկել է վտարման մասին որոշումը, մյուս օրը՝ օգոստոսի 6-ին, ընտանիքին տարել են Փարիզի օդանավակայան՝ թռիչքի:
Ընտանիքի մայրը վնասվածք է ստացել, օդանավակայանում հայրը էպիլեպսիկ ջղաձգումներ է ունեցել, բայց, չնայած դրան, վտարումը տեղի է ունեցել:
Իշխող սոցիալիստական կուսակցությունն իր վրդովմունքն է արտահայտել և պահանջել արդարացի մոտեցում ցուցաբերել տեղի ունեցածի հանդեպ:
«Առանց վարչական կարգավիճակը իմանալու, համենայնդեպս, մենք իրավունք չունենք նման կերպ վարվել մարդկանց հետ, որոնց միակ մեղքը կացության իրավունք չունենալն է»,- ասված է կուսակցության հայտարարության մեջ: