Ստամբուլում հարձակվել են ադրբեջանցիների հավաքատեղի սրճարանի վրա
ԱշխարհՍտամբուլում ադրբեջանցիների հավաքատեղի հանդիսացող սրճարանի վրա զինված հարձակում է տեղի ունեցել: Անհայտ անձինք մոտեցել են Բաշաքշեհիրի շրջանում գտնվող սրճարանին և պատուհաններից ներս կրակ բացել ավտոմատ զենքերով: Հարձակման հետևանքով սրճարանում գտնվող անձանցից 11-ը վիրավորվել են: Այս մասին, ինչպես հաղորդում է «Արմենպրես»-ը, հայտնում է թուրքական «Իհլաս» լրատվական գործակալությունը:
Ոստիկանությունը հրապարակել է միջադեպի հետ կապված սրճարանի մոտ տեղադրված տեսախցիկների նկարահանումները, որտեղ երևում է, թե կրակ բացելուց հետո հանցագործներն ինչպես են փախչում սրճարանի մոտից:
Սրճարանի թեյավաճառ Ջևդեթ Թայֆունը լրագրողներին պատմել է, որ գնդակոծության պահին ինքը դրսում է եղել և հարձակվողներին տեսել է հետևից: «Ես նրանց վրա քար նետեցի և վազեցի հետևներից: Նրանցից մեկը փորձեց կրակել ինձ վրա, բայց զենքը չկրակեց: Իշխանությունները պետք է ուշադրություն դարձնեն այս միջադեպի վրա: Մենք՝ ադրբեջանցիներս, չենք կարողանում խմբով հավաքվել որևէ տեղ: Ես այս սրճարանը չեմ կարող վերաբացել: Համոզված եմ, որ այստեղ այլևս ոչ ոք չի գա: Մենք նման դեպքերի առնչվել ենք նաև նախկինում», -ասել է Թայֆունը:
Ոստիկանությանը դեռևս հայտնի չէ ադրբեջանցիների սրճարանի վրա տեղի ունեցած հարձակման պատճառը: