Իսլամիստ ահաբեկիչները սպառնացել են Ադրբեջանին
ԱշխարհԻրաքի և Սիրիայի հյուսիսային զավթած շրջաններում «իսլամական պետություն» հռչակած «Իրաքի և Լևանտի իսլամական պետություն» (ԻԼԻՊ) ահաբեկչական խմբավորման ղեկավարները հերթական անգամ սպառնացել են Ադրբեջանին: Ինչպես հաղորդում է «Արմենպրես»-ը, ադրբեջանական ԶԼՄ-ները, հղում կատարելով ԻԼԻՊ-ին մոտ կանգնած աղբյուրներին, հայտնում են, որ ահաբեկչական կազմակերպության անդամ Մուհա մեդ Աբու Բարուդը հայտարարել է, որ Ադրբեջանում իսլամական կրոնը ոտնահարվում և ճնշվում է, ու դա պետք է կարգավորել:
ԻԼԻՊ-ի ջիհադականը նավթով հարուստ Ադրբեջանին «պատրաստի մսակարկանդակ» է անվանել: Նա նաև զգուշացրել է Ադրբեջանին, որ իսլամական պետությունը տարածվելու է նաև Ադրբեջանում:
«Մի օր իսլամական պետությունը ձգվելու մինչև Ադրբեջան: Մեզ համար Դաղստանը, Վրաստանը եփած խնձոր են, իսկ Ադրբեջանը պատրաստի մսակարկանդակ է, և մի օր մենք այն կհամտեսենք»,- հայտարարել է ԻԼԻՊ-ի մարտիկը:
Իրաքում «իսլամական պետություն» հռչակելուց հետո ԻԼԻՊ-ի ղեկավարները հայտարարել են, որ իրենց հաջորդ թիրախը կլինեն Ադրբեջանը և Թուրքիան:
Սիրիայում կառավարական ուժերի դեմ իսլամիստ ահաբեկիչների կողմից երկու տարի առաջ սկսված պատերազմում մինչ այժմ զոհվել են Ադրբեջանի քաղաքացի 200-ից ավելի մոջահեդներ: