Աշոտ Ղուլյանը՝ Լևոն Հայրապետյանի ձերբակալության մասին
ՀասարակությունԼՂՀ ԱԺ նախագահ Աշոտ Ղուլյանը դժվարացավ որևէ հստակ գնահատական տալ գործարար Լևոն Հայրապետյանի ձերբակալության վերաբերյալ, սակայն նշեց, որ գործարարի հետ ձևավորված իր հարաբերությունները հուշում են, որ այն, ինչ տեղի է ունեցել նրա հետ, ամենայն հավանականությամբ, թյուրիմացություն է: Նման կարծիք Աշոտ Ղուլյանը հայտնեց Ստեփանակերտում լրագրողների հետ հանդիպման ժամանակ:
«Արցախից արդեն տարբեր ձևաչափերով հայտարարություններ հնչել են: Անգամ ԱԺ բոլոր 3 խմբակցություններն են հայտարարություն արել: Վստահ եմ, որ նա իրավական առումով պաշտպանության կարիք չունի», - ասաց Ղուլյանը՝ հավելելով, որ իրենք դա արել են ոչ միայն ի պաշտպանություն Լևոն Հայրապետյանի, այլև՝ Արցախի, քանի որ Լևոն Հայրապետյանը Արցախի համար շատ բան է արել:
«Իմանալով նրա առողջական վիճակի մասին, այդ երկրի օրենսդրությունը և հաշվի առնելով մարդասիրական կանոնները, ինչպես նաև՝ իրավական բոլոր հնարավորությունները՝ մենք ասել ենք, որ նա պետք է շարունակի մնալ ազատության մեջ: Արցախը տեսել է, թե Լևոն Հայրապետյանն ինչպիսի ծրագրերի է աջակցել և թե ինչ ծրագրեր պետք է իրականացներ հետագայում: Այս բոլորը մեզ հիմք է տալիս կարծելու նաև, որ նա շուտով ազատության մեջ կհայտնվի և կշարունակի իրականացնել բարեգործական իր ծրագրերը»,- նշեց նա: