Սերժ Սարգսյանը և Իլհամ Ալիևը կարող են հանդիպել Ուելսում. Ուորլիք
ՔաղաքականԵԱՀԿ Մինսկի խմբի ամերիկացի համանախագահ Ջեյմս Ուորլիքը հայտարարել է, որ Մինսկի խումբը ջանում է, որպեսզի հրադադարի ռեժիմը պահպանվի, և որ հուլիսի 31-ին սկսված լարվածությունը լրջորեն անհանգստացրել է միջնորդներին:
Այս մասին, ինչպես հաղորդում է «Արմենպրես»-ը, Ուորլիքը հայտարարել է ադրբեջանական «Թուրան» լրատվական գործակալությանը տված հարցազրույցում:
Ուորլիքը նշել է, որ անցյալ ամսվա վերջին շփման գծում տեղի ունեցած և տասնյակ մարդկանց զոհվելու պատճառ դարձած իրադարձությունները կողմերին հետ են շպրտում խաղաղության հասնելու ճանապարհից: Նա ասել է, որ ղարաբաղյան խնդիրը ռազմական լուծում չունի, և պետք է բանակցությունների սեղանի շուրջ աշխատել ու կրկնապատկել ջանքերը լուծում գտնելու համար:
«Հրադադարի ռեժիմի պահպանումը նախապայման է դրա համար, և մենք հուսով ենք, որ լարվածության վերջին շաբաթների նվազումը կշարունակվի»,- ասել է նա:
Ամերիկացի համանախագահը չի բացառել Հայաստանի և Ադրբեջանի նախագահների' եկող շաբաթ, Ուելսում, ՆԱՏՕ-ի գագաթաժողովի ընթացքում և ՄԱԿ-ի Գլխավոր վեհաժողովում ևս հանդիպելու հնարավորությունը, որը, նրա խոսքով' կախված է լինելու հանդիպման և քննարկումների համար իրենց' նախագահների պատրաստակամությունից և ցանկությունից:
«Անձամբ ԱՄՆ պետքարտուղար Քերին պատրաստ է դերակատարություն ունենալ այդ հակամարտության կարգավորման գործում' եթե նրա մասնակցությունը կարողանա օգնել հասնելու դրան: Մենք կոչ ենք անում կողմերին լրջորեն ընկալել այդ հնարավորությունները: Գործը միայն արտգործնախարարների կամ նախագահների հանդիպում անցկացնելու մեջ չէ: Անհրաժեշտ է գործընթացը բարձրացնել այլ մակարդակ, որպեսզի այն բերի խաղաղ համաձայնության: Այնպես որ, եկեք սկսենք»,- ասել է Ուորլիքը: