Էրդողանն Իսրայելի հետ հարաբերությունները նորմալացնելու ժեստ է արել
ԱշխարհԻսրայելական մամուլը հայտնել է Թուրքիայի նորընտիր նախագահ Ռեջեփ Թայիփ Էրդողանի կողմից երկու երկրների միջեւ 6 տարի շարունակվող լարված հարաբերությունները նորմալացնելու մտադրության մասին:
Ինչպես հաղորդում է «Արմենպրես»-ը, անդրադառնալով երդմնակալությունից հետո Անկարայի Չանքայա նախագահական պալատում Էրդողանի կողմից կազմակերպված ընդունելությանը, The Times of Israel թերթը հայտնել է, որ օգոստոսի 30-ին տրված ճաշին հրավիրվել է նաեւ Թուրքիայում Իսրայելի դեսպանատան հավատարմատար Ժոզեֆ Լեւի Սֆարին: Ըստ թերթի' վերջին 6 տարվա ընթացքում առաջին անգամ Էրդողանը սեղմել է Իսրայելի պաշտոնական ներկայացուցչի ձեռքը, ավելին, նա գրկախառնվել է Սֆարիի հետ:
Իսրայելյան թերթն այդ իրադարձությունը կարեւորել է այն նկատառումով, որ Գազայի հետ կապված' 2008 թվականից սկսած Էրդողանը, որպես Թուրքիայի վարչապետ, խուսափել է Իսրայելի պաշտոնատարների հետ ուղղակի շփումներից: