Լոնդոնում Ադրբեջանին չաջակցելու BP-ին ուղղված պահանջով ակցիա կանցկացվի
ԱդրբեջանԼոնդոնում «BP, մի աջակցիր բռնաճնշումներին Ադրբեջանում» կարգախոսով ակցիա կանցկացվի: Ինչպես հաղորդում է «Արմենպրես»-ը, ակցիան կկազմակերպեն Facebook-ի օգտատերերը, ովքեր սոցկայքի Event էջում հանդես են եկել «BP, դադարեցրու Ադրբեջանում բռնաճնշումներին աջակցությունը» կարգախոսով:
Ակցիայի կազմակերպիչները օգտատերերին հրավիրում են մասնակցել Լոնդոնում BP-ի (British Petroleum) գրասենայկի առաջ սեպտեմբերի 17-ին անցկացվելիք բողոքի ակցիային: Օգտատերերին արված դիմումում ասվում է, որ Ադրբեջանում ակտիվիստների ձերբակալությունների հետ կապված իրենք չեն կարողանում բողոքի դուրս գալ Բաքվում BP-ի գրասենյակի առաջ, այդ պատճառով իրենց համախոհներին հրավիրում են բողոքի ակցիային մասնակցե BP-ի լոնդոնյան գրասենյակի առաջ:
Նշվում է, որ եկող շաբաթ լրանում է Ադրբեջանում BP-ի առաջնորդած «Դարի պայմանագիր» կոչված նախագծի 20 տարին: «Այդ պայմանագիրը դրեց BP-ի և Ալիևի ռեպրեսիվ ռեժիմի միջև երկու տասնամյակ շարունակվող համագործակցության հիմքը: Ադրբեջանում BP-ի դերը շատ մեծ է: Նավթային ընկերության ուժն ու փողը Ալիևի ռեժիմին քաջալերում են բռնաճնշումներ անելու և ժողովրդավարությանը խոչընդոտելու համար»,- ասվում է հայտարարության մեջ:
Event-ի կազմակերպիչները հայտնում են Ադրբեջանում 98 քաղբանտարկյալների առկայության և ազատության մեջ գտնվող ակտիվիստների ևս ձերբակալության վտանգի հետ առերեսվելու մասին: Կազմակերպիչների կարծիքով` «Դարի պայմանագրի» 20-ամյա տարելիցի առնչությամբ Ադրբեջանի քաղաքացիները BP-ից պետք է պահանջեն Ալիևի ռեժիմին կոչ անել ազատ արձակել քաղբանտարկյալներին: «BP-ն Ադրբեջանի իշխանության առաջ պետք է բարձրացնի իրավապաշտպաններ Լեյլա և Արիֆ Յունուսների, Ռասուլ Ջաֆարովի և Ինթիգամ Ալիևի հետ կապված հարցը և պահանջի երաշխավորել, որ ոչ մի իրավապաշտպան այլևս չի ձերբակալվելու Ադրբեջանում: BP-ն պետք է դադարեցնի 2015 թվականին Բաքվում անցկացվելիք Եվրոպայի օլիմպիական խաղերի հովանավորչությունը», -նշել են նրանք: