ՄԱԿ-ի գլխավոր քարտուղարն առանձնացրել է Էբոլայի դեմ պայքարի հինգ գերակայություն
ԱշխարհՄԱԿ-ի գլխավոր քարտուղար Պան Գի Մունն առանձնացրել է Էբոլա մահացու տենդի տարածման դեմ պայքարի՝ իր կողմից ստեղծվող միջազգային հանձնաժողովի հինգ գերակայություն: Ինչպես տեղեկացնում է «Արմենպրես»-ը, նա դրանք հրապարակել է համաշխարհային կազմակերպության Անվտանգության խորհրդի սեպտեմբերի 18-ին կայացած արտակարգ նիստում:
«Դա միջազգային առաքելություն է, որը կոչվելու է «Էբոլայի տարածմանը շտապ հակազդելու ՄԱԿ-ի առաքելություն», UNMER, այն կունենա հինգ գերակայություն՝ կասեցնել վիրուսի տարածումը, բուժել վարակվածներին, ապահովել անհրաժեշտ ծառայություններով, աջակցել կայունությանը և կանխել հիվանդության հետագա տարածումը»,- ասել է Պան Գի Մունը:
Նրա խոսքով՝ առաքելության առաջին խմբերից մեկը համաճարակի վայր ժամանի մինչև սեպտեմբերի վերջը:
ՄԱԿ-ի Անվտանգության խորհրդի նիստում նաև ընդունվել է բանաձև, որով, մասնավորապես, կոչ է արվում վերացնել սահմանափակումներն այն երկրների հետ սահմաններում, որոնք Արևմտյան Աֆրիկայում տուժել են Էբոլա տենդի համաճարակից, որպեսզի նրանք չմեկուսացվեն և դժվարություններ չստեղծվեն վարակի դեմ պայքարում:
Էբոլա վիրուսը շարունակում է սրընթաց տարածվել Արևմտյան Աֆրիկայի տարածքում: Ներկայումս վարակման դեպքեր են գրանցված արդեն Լիբերիայում, Սիեռա Լեոնեում, Գվինեայում, Նիգերիայում, Կոնգոյի Դեմոկրատական Հանրապետությունում և Սենեգալում: Տենդից մահացությունը կազմում է 53 տոկոս: Աառողջապահության համաշխարհային կազմակերպության՝ սեպտեմբերի 18-ին հրապարակված տվյալների համաձայն, համաճարակի զոհ է դարձել 2622 մարդ: Ընդամենը վարակվել է 5335 մարդ, հաղորդել է ՌԻԱ Նովոստին: