Կարեն Պետրոսյան, հայկական եկեղեցու պայթեցում. ԵԽԽՎ պատվիրակության օրակարգը հագեցած է
Արտաքին ՔաղաքականԵվրոպայի խորհրդի խորհրդարանական վեհաժողովի առաջիկա նիստում հայաստանյան պատվիրակությունը կբարձրացնի Ադրբեջանում գերեվարված Կարեն Պետրոսյանի դաժան սպանության, Իսլամական պետության ահաբեկիչների կողմից Սիրիայում Հայոց ցեղասպանության զոհերի հիշատակին նվիրված Սրբոց Նահատակաց եկեղեցու ականահարման, հուլիս-օգոստոսին ղարաբաղա-ադրբեջանական շփման գծում ադրբեջանական կողմի սանձազերծած դիվերսիոն հարձակումներին և կարևորագույն այլ հարցերի մասին:
«Արմենպրես»-ի հետ զրույցում ԵԽԽՎ հայաստանյան պատվիրակության անդամ, ԱԺ ԲՀԿ խմբակցության քարտուղար Նաիրա Զոհրաբյանը նշեց, որ ադրբեջանական պատվիրակությունը մի շարք հակահայ նախաձեռնություններով է փորձելու հանդես գալ, ինչին հայկական պատվիրակությունը պետք է համարժեք պատասխան տա և չեզոքացնի դրանք՝ նաև հաշվի առնելով Ադրբեջանի լոբբիստական լայն հնարավորությունները: «Այս պահին դեռևս Ադրբեջանի նախագահությունն է ընթանում Եվրոպայի խորհրդի նախարարների կոմիտեում և ԵԽԽՎ առաջիկա նստաշրջանում նախատե սված է Ադրբեջանի արտաքին գործերի նախարարի ելույթը: Մենք պատվիրակությունով կհավաքվենք և կքննարկենք նպատակահարմարությունը՝ ինչպես աշխատել այդ նիստի ժամանակ, ինչ մոտեցում դրսևորել»,- ասաց Զոհրաբյանը:
Բացի դրանից, բավականին լուրջ նախագծեր կան, որոնց համատեքստում հայկական պատվիրակության անդամները կբարձրաձայնեն իրենց հուզող հարցերի մասին: Նաիրա Զոհրաբյանը տեղեկացրեց, որ ինքն անպայման անդրադառնալու է Կարեն Պետրոսյանի դաժան սպանությանը: «Խոսելու եմ Իսլամական պետության ահաբեկիչների կողմից Դեր Զորի Սրբոց Նահատակաց եկեղեցու ականահարման մասին, որտեղ ակնհայտորեն թուրքական հետքն է: Եվ, բնականաբար, իմ ելույթներից մեկում, քանի որ օրակարգում նախատեսված է շատ կարևոր զեկույց ռասիստական և այլատյաց հայտարարությունների վերաբերյալ, ես խոսելու եմ մեր հարևան երկրի քաղաքական էլիտայի հակահայ, ռասիստական արտահայտությունների վերաբերյալ: Այնպես որ բավականաչափ օրակարգը հագեցած է, կան բավականին զեկույցներ, որոնց համատեքստում մենք կկարողանանք անդրադառնալ մեր երկրի քաղաքական օրակարգում, մեր տարածաշրջանային օրակարգում գտնվող խնդիրներին»,- ընդգծեց պատգամավորը՝ վստահություն հայտնելով, որ վերը նշված հարցերի մասին իրենց ելույթներում կբարձրաձայնեն նաև հայաստանյան պատվիրակության մյուս անդամները:
Հայկական պատվիրակությունը ԵԽԽՎ-ում կբարձրաձայնի նաև հուլիս-օգոստոսին ղարաբաղա-ադրբեջանական շփման գծում ադրբեջանական կողմի սանձազերծած դիվերսիոն հարձակումների հարցը: Նաիրա Զոհրաբյանն ընդգծեց, որ դա իրենց օրակարգի կարևոր հարցն է և վստահեցրեց, որ հայաստանյան պատվիրակության բոլոր անդամներն իրենց ելույթներում այդ հարցին կանդրադառնան:
Նաիրա Զոհրաբյանը տեղեկացրեց նաև, որ ԵԽԽՎ առաջիկա նստաշրջանի օրակարգում է մոնիթորինգի հանձնաժողովի ընթացակարգի վերաբերյալ զեկույցը, որում խոսվում է Հայաստանում սահմանադրական բարեփոխումների, նոր կառավարության ձևավորման վերաբերյալ: Պատգամավորի կարծիքով՝ այստեղ նույնպես հայկական պատվիրակության անդամները ասելիք կունենան, քանի որ քաղաքական տարբեր ուժեր տարբեր կարծիքներ ունեն այդ հարցերի վերաբերյալ: Զոհրաբյանը ևս մեկ անգամ ընդգծեց, որ առաջիկա նստածշրջանը հագեցած և լարված է լինելու, իսկ հայաստանյան պատվիրակությանը բավականին ծանրաբեռնված աշխատանք է սպասվում:
ԵԽԽՎ նստաշրջանը կմերնարկի սեպտեմբերի 29-ին, եւ կտեւի մինչեւ հոկտեմբերի 3-ը: