Հայաստանն ու Հունաստանը ձգտում են տնտեսական հարաբերությունները հասցնել ռազմաքաղաքական գործակցության մակարդակին
Արտաքին ՔաղաքականՀայաստանն ու Հունաստանն ամենաբարձր մակարդակով հանձնառու են երկկողմ միջպետական հարաբերությունների շարունակական զարգացմանը: Երկու պետությունների ղեկավարները Երևանում փոխըմբռնման մթնոլորտում քննարկել են համագործակցութան ուղիները: «Հայաստանի և Հունաստանի հարաբերություններն աչքի են ընկնում բարձր մակարդակով: Առանձնակի դրվատանքի է արժանի պաշտպանության նախարարությունների կառուցողական երկխոսությունը: Հայ զինծառայողները տարիներ շարունակ վերապատրաստվում են Հունաստանի ռազմական ուսումնական հաստատություններում, և պատահական չէ, որ միջազագային խաղաղարար առաքելություններում փոխգործակցությունն արժանացել է միջազգային բարձր գնահատականի»,- «Արմենպրես»-ի հաղորդմամբ' հայտարարեց ՀՀ նախագահ Սերժ Սարգսյանը սեպտեմբերի 30-ին պետական այցով Հայաստանում գտնվող Հունաստանի նախագահ Կարոլոս Պապուլիասի հետ հանդիպմանը հաջորդած համատեղ ասուլիսում:
Սերժ Սարգսյանի խոսքով' առևտրատնտեսական կապերը պետական մակարդակով խթանման կարիք ունեն: Նախագահներն այսօր կբացեն գործարար համաժողովը. մեծապես կարևորվում է նաև հայ-հունական միջկառավարական հանձնաժողովի գործունեությունը: «Համոզված ենք, որ պարտավոր ենք տնտեսական հարաբերությունները հասցնել քաղաքական երկխոսության և բարեկամության մակարդակին: Հունաստանի նախագահի այցը նշանավորվում է տնտեսական երկկողմ փաստաթղթղերի ստորագրմամբ, որը կհամալրի իրավապայմանագրային բազայի շուրջ 4 տասնյակ փաստաթղթերը»,- ասաց ՀՀ նախագահը:
Հունաստանը Եվրամիության և ՆԱՏՕ-ի անդամ է: Միջազգային հարթակներում հայ-հունական համագործակցության խորացման երկկողմ պատրաստակամություն ևս առկա է:
«Հայաստանը պատրաստ է ընդլայնել կապերը Եվրամիության հետ և հույս ունենք, որ բարեկամ Հունաստանը կաջակցի այս հարցում»,-նշեց Սերժ Սարգսյանը:
Հունաստանի նախագահ Կարոլոս Պապուլիասը ևս կարևորեց բարեկամության և գործակցության մակարդակի խորությունը: «Միակարծիք ենք, որ Հայաստանի և Հունաստանի միջպետական հարաբերությունները մշտապես աչքի են ընկել բարձր մակարդակով: Երկկողմ հարաբերությունները շատ բարձր մակարդակի վրա են և փոխգործակցությունը կարող է ընդլայնվել»,- ասաց Պապուլյասը, ով Հայաստանում է երկօրյա պետական այցով: ՀՀ նախագահի նստավայրում տեղի է ունեցել նաև հայ-հունական հարաբերությունների ամրապնդմանն ու խորացմանն ուղղված փաստաթղթերի ստորագրման արարողություն: