ՍԴՀԿ-ն կհստակեցնի դիրքորոշումը կառավարման խորհրդարանական մոդելին անցնելու նկատմամբ
ՔաղաքականՍոցիալ-դեմոկրատական հնչակյան կուսակցությունը բազմաթիվ անգամ ասել է, որ Հայաստանում համակարգային փոփոխություններ իրականացնելու անհրաժեշտություն կա, որոնք պետք է հանգեցնեն պետական կառավարման համակարգի տրամաբանության փոփոխությանը: Այս մասին «Արմենպրես»-ի հետ զրույցում ասաց ՍԴՀԿ ատենապետ Նարեկ Գալստյանը՝ անդրադառնալով դիտարկմանը, թե իշխանությունները երկրում համակարգային փոփոխությունների իրականացման գործընթացը կապում են սահմանադրական բարեփոխումների հետ: «Մենք բազմիցս ասել ենք՝ մեզ երբեք պետք չէ միայն մեկ անձի փոփոխություն, որովհետև մենք տարիների ընթացքում տեսել ենք, որ անձերը փոխվել են, սակայն իշխանությունների գործողությունների տրամաբանությունը չի փոխվել: Համակարգային փոփոխությունը պետք է բերի իշխանության և ընդհանրապես պետական կառավարման համակարգի տրամաբանության փոփոխության»,- «Արմենպրես»-ի հաղորդմամբ՝ նշեց Գալստյանը:
ՍԴՀԿ-ն իր դիրքորոշումը խորհրդարանական կառավարման մոդելին անցնելու առումով դեռևս չի հստակեցրել: Նարեկ Գալստյանը տեղեկացրեց, որ առաջիկայում կուսակցությունը փակ ժողովներ կանցկացնի, որոնցում, ի թիվս այլ հարցերի, կքննարկվի նաև այդ հարցը: «Այն, որ Հնչակյան կուսակցությունը համարում է, որ խորհրդարանական կառավարման մոդելը այլընտրանք չունի, սա փաստ է: Եվ այս փաստը նոր չէ. 1991թ. երբ կուսակցությունը վերադարձավ Հայաստան, իր կանոնադրության և ծրագրի մեջ հստակ նշված էր, որ Հայաստանին անհրաժեշտ է խորհրդարանական կառավարման համակարգ: Սակայն մենք այս կուսակցությունների նման չենք, որ մեկ անձով որոշում կայացնենք, երբեք մեզ նման շռայլություն թույլ չենք տվել: Մենք մեր ժողովների, խորհրդակցությունների ընթացքում կքննարկենք և կհստակեցնենք մեր դիրքորոշումը»,- նշեց Գալստյանը:
Նա ընդգծեց, թե ինչպիսի դիրքորոշում էլ կուսակցությունը որդեգրի քննարկումների արդյունքում, ակտիվ պայքար է մղելու այդ դիրքորոշումը կյանքի կոչելու համար: