ԱՄՆ-ը հայտարարել է, որ ԻՊ-ի ոչնչացման համար տարիներ են պահանջվում, այլ ոչ թե տասնամյակ
ԱՄՆ«Իսլամական պետության» ոչնչացման համար պահանջվում են տարիներ, այլ ոչ թե տասնամյակ: Այս մասին նոյեմբերի 6-ին հայտարարել է ԱՄՆ զինված ուժերի կենտրոնական հրամանատարության ղեկավար Լլոյդ Օստինը: Ինչպես հաղորդում է «Արմենպրես»-ը՝ վկայակոչելով արաբական լրատվամիջոցները, նրա խոսքով, ծայրահեղական կազմակերպության անդամների թիվը Իրաքում և Սիրիայում գնահատվում է 9-17 հազար: Նա հաստատել է, որ ԱՄՆ-ի հարվածի գլխավոր ուղղությունը այժմ Իրաքն է, այլ ոչ թե Սիրիան:
ԱՄՆ ռազմական ղեկավարությունը հայտարարել է, որ օդային հարվածներն ուղղվել են Սիրիայում «Խորասան» ծայրահեղական խմբավորման ուղղությամբ: Օդային 5 հարվածներն ուղղվել են Իդլիբի շրջանի Սարմա գյուղաքաղաքի ուղղությամբ: Հարձակման հետևանքով վնասների մասին դեռ հստակ տեղեկություններ չեն հաղորդվում: Հայտնի է, որ սպանվել է «Խորասան» խմբավորման ղեկավարներից մեկը:
Ամերիկյան հետախուզության տեղեկություններով, «Խորասան»-ի շուրջ 50 անդամը նաև «Ալ Կաիդա»-ի անդամներ են, որոնք Սիրիա են մտել Աֆղանստանից և Պակիստանից' արևմտյան երկրներում ահաբեկչություններ իրականացնելու նպատակով: Սիրիայում «Խորասան»-ը գտնվում է «Ջաբհա ան Նուսրա»-ի պաշտպանության տակ: