Թուրքիայի ճարտարապետները Հռոմի պապին հորդորել են չայցելել նախագահական պալատ
ԱշխարհԹուրքիայի ճարտարապետների պալատի Անկարայի մասնաճյուղի ներկայացուցիչները նամակ են գրել Հռոմի Ֆրանցիսկոս պապին' կոչ անելով Թուրքիա կատարելիք այցի ժամանակ չայցելել նախագահական նոր պալատ:
Ինչպես հաղորդում է «Արմենպրես»-ը, այս մասին տեղեկացնում է թուրքական Today’s Zaman պարբերականը:
Ճարտարապետները նամակում ընդգծել են, որ «Սպիտակ» անվանումն ստացած նախագահական պալատը, որի առաջին պաշտոնական հյուրն է լինելու Ֆրանցիսկոսը, կառուցվել է ապօրինաբար: Նրանք խնդրել են Անկարայում Վատիկանի դեսպանատնից իրենց դիմումը ներկայացնել Հռոմի պապին' կապված նոյեմբերի 28-ին նախատեսված պաշտոնական ընդունելության արարողության հետ: Ճարտարապետներն իրենց նամակում ներկայացրել են նախագահի նստավայրի անօրինականությունը փաստող ապացույցներ' հավելելով, որ նմանօրինակ դիմումներ ներկայացնելու են նաև օտարերկրյա դեսպանատներին և տարբեր երկրների նախագահներին' թույլ չտալու համար «Սպիտակ տան օրինականացումը»: Թուրքիայի ճարտարապետների պալատի Անկարայի մասնաճյուղի ներկայացուցիչները հավաստիացրել են նաև, որ անհրաժեշտության դեպքում իրենք պալատի օրինականության հարցը կբարձրացնեն միջազգային մակարդակի:
Թուրքիայի նախագահական նոր նստավայրը զբաղեցնում է 300 հազար քառակուսի մետր տարածք և ունի 1000 սենյակ: Այն իր մեծությամբ առաջինն է ողջ աշխարհի նախագահական և թագավորական նստավայրերի շարքում: Թուրքիայի նախագահի պալատին մեծությամբ հաջորդում են Բրունեյի սուլթանի և Իսպանիայի թագավորի նստավայրերը: Թուրքիայի նախագահական նոր նստավայրի կառուցման և կահավորման համար ծախսվել է շուրջ 1 միլիարդ 370 հազար թուրքական լիրա (ավելի քան կես միլիարդ ԱՄՆ դոլար): Միայն նախագահի նստավայրի ներսում գտնվող աստիճանները, որոնց առաջ Էրդողանը կանգնելու է պաշտոնական ընդունելությունների ժամանակ, իրենց արժողությամբ շուրջ 4 միլիոն թուրքական լիրա են (շուրջ 1 միլիոն 790 հազար ԱՄՆ դոլար): Ուշագրավ է, որ Թուրքիայի նախագահի նոր նստավայրի շուրջ անդրադարձներ է հրապարակում նաև միջազգային մամուլը: Բրիտանական ԶԼՄ-ները Թուրքիայի նախագահական նոր նստավայրը համարել են Էրդողանի անսահմանափակ իշխանության' սուլթանության խորհրդանիշ:
Հռոմի պապը Թուրքիայում կլինի նոյեմբերի 29-30-ը: Ֆրանցիսկոս պապը նախ կժամանի Անկարա, այնուհետև կայցելի Ստամբուլ: Հռոմի պապի այցելությունը կկայանա Պոլսո Հունաց տիեզերական պատրիարք Բարդուղիմեոսի հրավերով: Ֆրանցիսկոսն ու Բարդուղիմեոսը նոյեմբերի 30-ին միասին կմասնակցեն պատարագի: Կաթոլիկ աշխարհի հոգևոր առաջնորդ Ֆրանսիկոսը կլինի Հռոմի չորրորդ պապը, ով այցելում է Թուրքիա: