ՌԴ-ի կառավարությունում հավանություն են տվել ԵՏՄ-ին Հայաստանի միանալու օրինագծին
ՏնտեսությունՌԴ-ի կառավարության օրենքի նախագծերի պատրաստմամբ զբաղվող հանձնաժողովը հավանություն է տվել Եվրասիական տնտեսական միությանը Հայաստանի միանալու պայմանագրի վավերացման մասին օրինագծին: Այդ մասին, ինչպես տեղեկացնում է «Արմենպրես»-ը, նոյեմբերի 18-ին հաղորդվում է նախարարների կաբինետի կայքում:
Օրինագիծը ներկայացվել է ԱԳ նախարարության և տնտեսական զարգացման նախարարության կողմից և քննարկվելու է կառավարության նիստում:
«Պայմանագրի ուժի մեջ մտնելը կապահովի 2015 թվականի հունվարի 2-ից Եվրասիական տնտեսական միությանը Հայաստանի մասնակցությունը և թույլ կտա գործարկել բացառումների և սահմանափակումների կրճատման, պայմանագրի մասնակից պետությունների շուկա ձեռնարկատիրական գործունեության սուբյեկտների փոխադարձ մուտքի գործընթացը»,- ասված է հաղորդագրության մեջ:
Դրանով իսկ հիմք է ստեղծվում առևտրատնտեսական և կոոպերացիոն կապերի հետագա զարգացման, ազգային արտադրությունների մրցունակության բարձրացման և աշխարհի շուկաներում ԵՏՄ-ի երկրների դիրքերի ուժեղացման համար:
Ռուսաստանը, Բելառուսը և Ղազախստանը մայիսին ստորագրել և արդեն վավերացրել են 2015 թվականի հունվարի 1-ից Եվրասիական տնտեսական միության ստեղծման պայմանագիրը: Հոկտեմբերի 10-ին Մինսկում պայմանագիր է ստորագրվել դրան Հայաստանի միանալու մասին, հաղորդել է ՌԻԱ «Նովոստին»: