Մեծ Բրիտանիայի խորհրդարանի քայքայվող շենքը նորոգելու համար 4,7 մլրդ դոլար կպահանջվի
ԱշխարհՎեստմինստերյան պալատը, որտեղ նիստեր է գումարում Մեծ Բրիտանիայի խորհրդարանը, քանդվում է և շտապ հիմնանորոգման կարիք ունի: Ըստ որում շենքի վերականգնման համար կպահանջվի առնվազն 4,7 միլիարդ դոլար, տեղեկացնում է «Արմենպրես»-ը՝ հղում անելով BBC News-ին:
Շենքն իր պատմության ընթացքում դիմացել է մի քանի հեղեղումների և հրդեհների: Քարակերտ ճակատի մի մասը գտնվում է վթարային վիճակում, քարե երեսպատվածքը փշուր-փշուր է լինում թեթև հպման դեպքում, իսկ շենքի ենթակառուցվածքի մեծ մասը չի նորոգվել 1950-ական թվականներից: Շենքի նկուղները լի են ասբեստով, կաթող խողովակներով ու հին կաբելներով:
Նորոգումը կլինի բարդ և թանկ, BBC-ին տված հարցազրույցի ժամանակ հայտարարել է բարձրաստիճան մի պաշտոնյա՝ անունը չհայտնելու պայմանով: Նա հավելել է, որ նորոգման աշխատանքներն սկսելու մասին վերջնական որոշում տակավին չի ընդունվել:
Ամեն տարի շենքը հարաբերականորեն աշխատանքային վիճակում պահելու համար ծախսվում է 47 միլիոն դոլար: Մասնագետները ելնում են այն բանից, որ հիմնանորոգումը կնստի 4,7 միլիարդ դալար: BBC-ի աղբյուրն ասել է, թե կզարմանա, եթե այդ գումարը չմեծանա, հաղորդել է «Ինտերֆաքս»-ը: