Արմեն Աշոտյանն ադրբեջանցի լրագրողին բացատրել է ԼՂ հակամարտության ռազմական կարգավորման անհնարինությունը
Գիտություն և Մշակույթ«Եվրասիական ինտեգրացիա. նվաճումներ և խնդիրներ» խորագիրը կրող երկրորդ հասարակական ֆորումի ժամանակ, որը կայացել է Կազանում, ՀՀ կրթության և գիտության նախարար Արմեն Աշոտյանն ադրբեջանական լսարանին է կարողացել հասցնել մի քանի տեսակետեր ինչպես ԵՏՄ-ին Հայաստաի անդամակցության, այնպես էլ ԼՂ հակամարտության վերաբերյալ: Ինչպես հաղորդում է «Արմենպրես»-ը, Արմեն Աշոտյանը պատասխանել է ադբեջանական Haqqin.az լրատվականի մի քանի հարցերի:
ՀՀ կրթության և գիտության նախարարը նշել է, որ Հայաստանը խորը և ռազմավարական հարաբերություններ ունի Ռուսաստանի Դաշնության հետ' մասնավորապես Հավաքական անվտանգության պայմանագրի կազմակերպության շրջանակներում, որը հանդես է գալիս որպես ռազմաքաղաքական միություն: «Եվրասիական տնտեսական միությունում մենք կգտնենք մեր տեղը տնտեսության բնագավառում հավասար գործընկերների միջև»,- նշել է Աշոտյանը: Նա առանձնացրել է Հայաստանի մրցակցային առավելությունները, որպես այդպիսին նշելով նախ հայկական սփյուռքի գոյությունը, ապա նաև այն տարածաշրջանը, որում երկիրը տեղակայված է. բացի Հայաստանից, Հարավային Կովկասի այլ երկիր չի անդամակցում ԵՏՄ-ին:
Խոսելով Հայաստանի' ԵՏՄ-ին անդամակցելու հետևանքով երկրում ի հայտ եկած բողոքի մասին' Աշոտյանն ադրբեջանցի լրագրողին բացատրել է, որ Հայաստանը ժողովրդավար պետություն է, որտեղ բարձր մակարդակի վրա է գտնվում քաղաքացիական ինստիտուտների զարգացումը: Խոսքի ազատությամբ չփայլող երկիրը ներկայացնող մասնագետին նախարարը հասկացրել է, որ խոսքը գնում է խոսքի, մտքի և հավաքներ իրականացնելու ազատության մասին:
Աշոտյանը լրագրողին տեղեկացրել է, որ տասը միլիոնանոց հայերն ունեն երկու պետություն' ճանաչված Հայաստանի Հանրապետությունը և չճանաչված Լեռնային Ղարաբաղի Հանրապետությունը: Նա բնական է համարել այն, որ Հայաստանը իրավունք ունի արտահայտել միայն իր տեսակետերը և որևէ տեղ անդամակցել միայն իր անունից: «Մենք միջազգային այնպիսի կազմակերպությունների անդամ ենք, ինչպիսիք են ՄԱԿ-ը, Եվրոպայի խորհուրդը, ԵԱՀԿ-ն: Իսկ Լեռնային Ղարաբաղի Հանրապետությունը տվյալ փուլում կառուցում է իր պետականությունը' անկախ նրանից ճանաչել են իրեն, թե ոչ: Սակայն երկու հայկական պետությունների գոյության փաստն արդեն կատարված պատմական իրողություն է: Եվ տարածաշրջանի բարգավաճման համար անհրաժեշտ է հաշտվել սրա հետ ու աշխատել երկարատև հեռանկարի համար' ելնելով այս իրականությունից»,- շեշտել է Աշոտյանը: Նա «հետաքրքրասեր» ադրբեջանցի լրագրողին հասկացրել է, որ ղարաբաղյան հակամարտությունը չունի ռազմական կարգավորման հեռանկար և դրա հետ պետք է արդեն հաշտվել և դա ընդունել իբրև աքսիոմ:
Կազանում տեղի ունեցող ֆորումի ժամանակ ադրբեջանական կողմին անհանգստացրել էր նաև այն փաստը, որ նիստերից մեկի ժամանակ Եվրասիական միության մասին ցուցադրված տեսաֆիլմում պատկերված քարտեզում Լեռնային Ղարաբաղը պատկերված չէր որպես Ադրբեջանի մաս: