ՄՕԿ-ի գործկոմի հերթական նիստում քննարկվելու է Թոմաս Բախի «հեղափոխական» ծրագիրը
ԱշխարհՄոնակոյում սկսվել է միջազգային օլիմպիական կոմիտեի գործկոմի հերթական նիստը: Գլխավոր թեման օլիմպիական շարժման գործունեության (մինչև 2020 թ.) ուղղություններն են: Սա, կարելի է ասել, ՄՕԿ-ի նախագահ Թոմաս Բախի հեղափոխական ծրագիրն է, որի քննարկմանը մասնակցել է 14 աշխատանքային խումբ: «Օրակարգ 2020»-ի առաջարկությունները հաստատվել են դեռևս երկու ամիս առաջ' հոկտեմբերին:
Երկօրյա միջոցառման օրակարգում բազմաթիվ կարևոր այլ հարցեր նույնպես կան' օլիմպիական խաղերին հավակնող մայրաքաղաքների հայտերի ընդունման նոր ձևաչափեր, ՄՕԿ-ի զարգացման կայուն ծրագիր, արդար, ազնիվ պայքար մրցասպարեզներում, օլիմպիական հեռուստաալիքի ստեղծում, պատանեկան սպորտի զարգացում, պատանեկան օլիմպիական խաղերի ծրագրերի մշակում, ՄՕԿ-ի մշակութային քաղաքականություն, կառավարումը սպասարկող հարցեր, էթիկայի, լիցենզավորման և առևտրի հետ կապված քննարկումներ, ՄՕԿ-ի անդամ դառնալու նոր կանոնակարգ: «Արմենպրես»-ի հաղորդմամբ, այս մասին տեղեկացնում է ՀԱՕԿ-ի լրատվական բաժինը:
ՄՕԿ-ի գործկոմը կաշխատի ուրբաթ և շաբաթ, իսկ կիրակի օրը' դեկտեմբերի յոթին, Մոնտե Կառլոյի «Գրիմալդի ֆորում» կոնգրես կենտրոնում աշխատանքը կսկսի ՄՕԿ-ի 127-րդ գագաթաժողովը: