Ընդդիմադիրների հայտարարությունը փորձ էր ԱԺ-ի աշխատանքները ձախողելու, որը չստացվեց. Գալուստ Սահակյան
ՔաղաքականԸնդդիմադիր խմբակցությունների հայտարարությունը փորձ էր ԱԺ-ի աշխատանքները ձախողելու, որը չստացվեց: Այս մասին այսօր Ազգային ժողովի նիստում հայտարարեց ԱԺ նախագահ Գալուստ Սահակյանը: Վերջինս նշեց, որ խմբակցությունների ղեկավարների հետ խորհրդակցել են, և ինքն առաջարկում է հայտարարության հետևյալ նախագիծը:
«ՀՀ ԱԺ-ն խորապես մտահոգված լինելով վերջին օրերին մեր երկրում հայտնի գործիչների նկատմամբ բռնություն կիրառելու անընդունելի երևույթներով, ակնկալելով իրավապահ մարմինների օպերատիվ ու անաչառ գործունեությունը, մեղավորներին արագ բացահայտելու ու օրենքի ամբողջ խստությամբ պատասխանատվություն կանչելու համար, ընդգծելով մեր գործընկեր Արամ Մանուկյանի և մյուս քաղաքացիների գործերի քննությունն ԱԺ-ի ու Աժ նախագահի ուշադրության կենտրոնում պահելու հանգամանքը, հայտարարում ենք, որ խստորեն դատապարտում ենք ցանկացած ոտնձգություն որևէ քաղաքացու ու հատկապես քաղաքացիական ու հասարակական գործիչների նկատմամբ:
Կոչ ենք անում բոլոր քաղաքական ուժերին ու կազմակերպություններին իրենց հրապարակային խոսքում զերծ մնալ այնպիսի հայտարարություններից, որոնք կարող են խոչընդոտել իրավապահ մարմինների գործունեությանը և կարող են անհարկի լարվածություն ավելացնել հասարակության մոտ»:
ԱԺ նախագահը խորհրդարանական ուժերին առաջարկեց միանալ այս հայտարարությանը: «Սա նախագիծ է, և եթե քննարկման խնդիր կլինի, կարող ենք ձևակերպումների մեջ փոփոխություններ մտցնել»: