Էրդողանը հայտարարել է «գյուլենականների» դեմ հաղթանակ տանելու մասին
ԱշխարհԹուրքիայի նախագահ Ռեջեփ Թայիփ Էրդողանը հայտարարել է արդի իսլամի գաղափարախոս Ֆաթուլլահ Գյուլենի կողմնակիցների' «գյուլենականների» դեմ հաղթանակ տանելու մասին:
Այս մասին, ինչպես հաղորդում է «Արմենպրես»-ը, հայտնում են թուրքական ԶԼՄ-ները:
Նրա խոսքով' Գյուլենի շարժման դեմ պայքարը պայքար էր երկրի ազատության համար: Նա նշել է, որ Թուրքիայում ապօրինի կառույցների դեմ պայքարը շարունակվելու է:
«Գյուլենականների» դեմ անցյալ տարվա դեկտեմբերի կեսերից սկսված պայքարում վերջին իրադարձությունը Թուրքիայում հանդիսացել է այս տարվա դեկտեմբերի 14-ին թուրքական ոստիկանության կողմից «Զաման» թերթի գլխավոր խմբագիր Էքրեմ Դումանլըի ձերբակալությունը: Բացի այդ, ձերբակալվել են Samanyolu հեռուստաալիքի և մի շարք թերթերի աշխատակիցներ, որոնք կասկածվում են Ֆաթուլլահ Գյուլենի շարժմանը հարելու մեջ: Այդ օրը ձերբակալվել են ԶԼՄ-ների, դատաիրավական համակարգի 27 աշխատակիցներ:
Էրդողանը Գյուլենին հայտարարել է իր թիվ մեկ գլխավոր թշնամին: Թուրքական դատարանը դեկտեմբերի 19-ին Ֆաթուլլահ Գյուլենին ձերբակալելու վճիռ է կայացրել: Թուրքիայի նախագահի գլխավոր քաղաքական հակառակորդը մեղադրվում է «ահաբեկչական կազմակերպության» մասնակից լինելու մեջ:
Եվրամիությունը և ԱՄՆ-ը քննադատել են Թուրքիայում իրագործված ձերբակալությունները:
73-ամյա Ֆաթուլլահ Գյուլենը նախկինում եղել է Էրդողանի մերձավոր կողմնակիցը և Թուրքիայի ներկայիս նախագահին օգնել է իշխանության գալ: Էրդողանը Գյուլենին մեղադրում է պետական հեղաշրջման փորձի և բարձրաստիճան պետծառայողների հեռախոսային խոսակցությունները զանգվածաբար լսելու գործը կազմակերպելու մեջ, որոնց մի մասի վերծանումն օգտագործվել է անցյալ տարվա դեկտեմբերի 17-ին Թուրքիայում Էրդողանի որդու, դստեր, փեսայի և կառավարության 4 անդամների մասնակցությամբ խոշոր կոռուպցիոն գործողությունների բացահայտման համար:
ԱՄՆ-ում վտարանդիության մեջ բնակվող «Հիզմեթ Հարեքեթի» ազդեցիկ կրոնական կազմակերպության առաջնորդ Ֆեթուլլահ Գյուլենի շարժումը, որը համարվում է նաև նուրսիստների (նուրչուլար) շարժում, արդի իսլամ քարոզող հզոր շարժում է: Գյուլենական շարժումը քարոզում է իսլամական չափավորություն, հանդուրժողականություն, միջկրոնական երկխոսություն, իսլամի և ժողովրդավարության համատեղելիություն: