Հայաստանում արդյունաբերական նոր ճյուղերը կազատվեն հարկերից
ՏնտեսությունՀայաստանում արդյունաբերությամբ զբաղվող այն ընկերությունները, ովքեր կփորձեն հանրապետության համար նոր արտադրություն կազմակերպել, այսուհետև կազատվեն բոլոր հարկերից:
Այս մասին տարեվերջյան ամփոփիչ ասուլիսի ժամանակ հայտարարեց ՀՀ էկոնոմիկայի նախարար Կարեն Ճշմարիտյանը' նշելով, որ այդ ձեռնարկությունները կգործեն Հայաստանում հիմնված ազատ տնտեսական գոտիներում: «Պարտադիր պայման է լինելու այն, որ այդ ձեռնարկությունները սկսեն նոր արտադրություններ, ինչպիսիք մինչ օրս չեն եղել հանրապետությունում: Այսինքն' այսուհետև ազատ տնտեսական գոտիները կգործեն արդյունաբերողների համար»,- «Արմենպրես»-ի հաղորդմամբ, հայտնեց նախարարը:
Կարեն Ճշմարիտյանն ընդգծեց, որ վերջին 6 ամսում Հայաստանում քիչ-քիչ ավելացել են արտադրության ծավալները: «Արդյունաբերության աճին հատկապես նպաստել են հիմնային մետաղների, սննդամթերքի, ծխախոտային արտադրանքի, ռետինե և պլաստմասայե ապրների, ինչպես նաև թղթի արտադրությունը»,- ասաց նա: Նախարարը տեղեկացրեց, որ ներկայումս ընթացքի մեջ է արտահանմանն ուղղված արդյունաբերական քաղաքականության ռազավարական շրջանակներում հաստատված 8 ոլորտային ռազմավարությունների պատրաստումը:
Հայաստանի տնտեսական գերատեսչության ղեկավարը հատկապես կարևորեց տեղեկատվական տեխնոլոգիաների ոլորտի զարգացումը' նշելով, որ այդ ոլորտում տարեկան աճը շուրջ 25 տոկոս է: «Տեղեկատվական տեխնոլոգիաների ոլորտում նոր ընկերությունների ձևավորման և աշխատատեղերի ստեղծման նպատակով սկսնակ ձեռնարկությունների համար արտոնություններ են տրվել: Պետբյուջեից դրա համար տրամադրվել է 80 մլն դրամ, արդյունքում ստեղծվել է Գյումրու տեխնոպարկը, որտեղ ներկայումս ուսուցում են անցնում 1100 ուսանողներ և դպրոցականներ»,- ասաց նա: Ճշմարիտյանը կարևորեց նա և այն ծրագիրը, որով սահմանամերձ և հեռավոր 344 գյուղերում իրականացվել է անլար ինտերները սարքավորումների տեղադրում:
Էկոնոմիկայի նախարարը նշեց, որ նախարարության կողմից իրականացվող հետազոտության արդյունքներով' 2014 թ. Հայաստանում գործում են 396 տեղեկատվական տեխնոլոգիաների ընկերություններ, որնց շուրջ կեսն արտասահմանյան ընկերությունների մասնաճյուղեր են: Ոլորտում աշխատում են 11 հազար 560 մարդ, իսկ տարեկան հասույթն այստեղ կազմում է շուրջ 280 մլն դոլար: