Աշխատանքի միջազգային կազմակերպությունը գործազուրկների աճ է կանխատեսում մինչև 212 մլն մարդ
ԱշխարհՄինչև 2019 թվականը աշխարհում գործազուրկների թիվն ներկայիս 201 միլիոնից կհասնի 212 միլիոնի: Ինչպես տեղեկացնում է «Արմենպրես»-ը, այս կանխատեսումն է բովանդակում Աշխատանքի միջազգային կազմակերպության (ԱՄԿ) «Գլոբալ զբաղվածությունը և սոցիալական հեռանկարը. 2015 թվականի միտումները» զեկույցը, որը հունվարի 20-ին հրապարակվել է Ժնևում:
Առաջիկա տարիներին գործազրկության աճը, ինչպես նշում են հետազոտության հեղինակները, պայմանավորված է համաշխարհային տնտեսության մի քանի գործոնների զուգորդմամբ, ներառյալ դանդաղ աճը, եկամուտների անհավասարության մեծացումը և աճող անկայունությունը: «2008 թվականին ճգնաժամի սկսվելուց ի վեր փակվել է ավելի քան 61 մլն աշխատատեղ և, ըստ մեր կանխատեսման, գործազրկությունը կշարունակի աճել մինչև տասնամյակի վերջը»,-ներկայացնելով զեկույցը, հայտարարել է Աշխատանքի միջազգային բյուրոյի գլխավոր տնօրեն Գայ Ռայդերը: «Զբաղվածության ճգնաժամը բնավ է ավարտված չէ»,-արձանագրել է նա:
Փորձագետները հատկապես անհանգստացած են Հարավային Ասիայի և Աֆրիկայի՝ Սահարայից հարավ ընկած շրջանների իրադրությամբ, որոնց բաժին է ընկնում «անկայուն» աշխատատեղերի երեք քառորդը: Արաբական երկրներում և Լատինական Ամերիկայի առանձին պետություններում կանխատեսումները վերջին ժամանակներս նույնպես վատթարացել են: ԱՄԿ-ում այն կարծիքին են, որ նավթի կտրուկ նվազած գները կարող են նպաստել զբաղվածության աճին բազմաթիվ «առաջավոր տնտեսություններում և մի քանի ասիական երկրներում»: Միևնույն ժամանակ աշխատաշուկան խիստ կտուժի Լատինական Ամերիկայի, Աֆրիկայի և «արաբական տարածաշրջանի» նավթարդյունահանող և գազարդյունահանող պետություններում:
ՏԱՍՍ-ը նշում է, որ ճգնաժամը ծանր հարված է հասցրել 15-ից 24 տարեկան երիտասարդներին: Տարիքային այս կատեգորիայում գործազրկությունը 2014 թվականին մոտեցել է 13 տոկոսին, և առաջիկա տարիներին հետագա աճ է սպասվում: Դրա հետ մեկտեղ տարեց աշխատողները «համեմատաբար լավ» են հաղթահարում 2008 թվականին սկսված ճգնաժամը:
ԱՄԿ-ն կանխատեսում է եկամուտների անհավասարության մեծացում: Այժմ 10 տոկոս առավել հարուստներն ստանում են բոլոր եկամուտների 30-ից մինչև 40 տոկոսը այն դեպքում, երբ 10 տոկոս ամենաաղքատները՝ 2-ից մինչև 7 տոկոսը: Փորձագետներն ընդգծում են, որ նման միտումները խախտել են հավատը կառավարությունների նկատմամբ և մեծացրել սոցիալական հուզումների վտանգը: Այս խնդիրն առանձնապես սուր բնույթ է կրում այն երկրներում ու տարածաշրջաններում, որտեղ երիտասարդության շրջանում բարձր է գործազրկության մակարդակը կամ այն արագորեն աճում է: