Արևմուտքն ու Արևելքը պետք է միավորվեն ու ջարդեն այդ նորածին հրեշին` «Իսլամական պետությանը». քաղաքագետ
Արտաքին Քաղաքական![Արևմուտքն ու Արևելքը պետք է միավորվեն ու ջարդեն այդ նորածին հրեշին` «Իսլամական պետությանը». քաղաքագետ](/timthumb.php?src=disc/old/171370.png&w=780)
Ղրիմի վերադարձը Ռուսաստանին և Իսլամական պետության ստեղծումը քաղաքագետ Լևոն Մելիք-Շահնազարյանը նախորդ տարվա ամենակարևոր միջազգային իրադարձություններն է համարում: Դրանք ոչ միայն մի շարք հարցերում ընթացք են փոխել, այլև լուրջ առնչություն ունեն Հայաստանի հետ:
«Արմենպրես»-ի հետ զրույցում քաղաքագետն ասում է, որ դեռ 7 տարի առաջ ուկրաինական լրատվամիջոցներին տված հարցազրույցում նշել է, որ Ղրիմը երբեք Ուկրաինայինը չի լինելու: «Ասացի' այն լինելու է կամ Ռուսաստանինը, կամ Թուրքիայինը և եթե Ուկրաինան և ՌԴ-ն վիճեն Ղրիմի համար' կշահի Թուրքիան և լավ կլինի' հանրաքվեի միջոցով Ուկրաինան վերադարձնի Ղրիմը ՌԴ-ին, առանց որևէ թշնամության և հարաբերությունները խզելու»,- ասում է քաղաքագետը' հավելելով, որ սկզբում իր խոսքերի իմաստը ուկրաինացի լրագրողները չեն ընկալել, սակայն վերջին իրադարձություններից հետո կապվել են Մելիք-Շահնազարյանի հետ և նշել, որ վերջինս ճիշտ էր: Քաղաքագետի գնահատմամբ' Ղրիմը քաղաքական մեծ նշանակություն ունի և եթե Թուրքիան ձգտեր ու կարողանար քաղաքական և ռազմական եղանակով վերցնել Ղրիմը' դա նշանակում է, որ Հայաստանը կհայտնվեր ամբողջական շրջափակման մեջ: «Մեր բոլոր ճանապարհները, բոլոր ուղղությամբ կփակվեին, իսկ Թուրքիան երբեք չի կորցնում առիթը Հայաստանին ամբողջովին շրջափակելու' հատկապես եթե կարողանա անել առանց պատերազմի»,- ասում է Մելիք-Շահնազարյանը' հավելելով, որ Հայաստանին ավելի ձեռնտու է Ղրիմը տեսնել Ռուսաստանի կազմում:
Միջազգային մակարդակի երկրորդ կարևորագույն իրադարձությունն Իսլամական պետության ձևավորումն է: «Այն շատ վտանգավոր է: Իրականում մենք ապրում ենք 7-րդ դարում: Այդ դարում ծնվեց Իսլամը. շատ ագրեսիվ կերպով ծնվեց և տարածվեց: Այն, ինչ կատարվում է այժմ' նախորդի կրկնությունն է: Ներկայիս դահիճները պահպանում են 7-րդ դարի իսլամը, նրանք զրոյի են հավասարեցնում 1400 տարվա քաղաքակրթությունը, գաղափարախոսություններն ու փիլիսոփայությունը, ինչը շատ գրավիչ է բազմաթիվ մուսուլման հավատացյալների համար»,- ասաց Մելիք-Շահնազարյանը' հավելելով, որ ԻԼԻՊ-ը վտանգավոր է ամբողջ աշխարհի և հատկապես քրիստոնյա ժողովրդի համար: Նա վստահ է, որ մոտ ապագայում Մերձավոր Արևելքում քրիստոնյա բնակչություն չի մնալու:
«Դա կհանգեցնի խոշոր կրոնական պատերազմի: Այսօր Արևմուտքն ու Արևելքը պետք է միավորվեն ու ջարդեն այդ նորածին հրեշին, հակառակ դեպքում վաղը ուշ կլինի»,- ասաց քաղաքագետը' հավելելով, որ արշավը դեպի Եվրոպա արդեն սկսվել է, և նրանց համար եվրոպական երկրներն առաջնային թիրախում են:
Ըստ քաղաքագետի, եթե այսօր չբռնեն «Իսլամական պետության» ձեռքը, վաղը կրոնական պատերազմը կարող է գալ նաև Հարավային Կովկաս. այդ ժամանակ իրավիճակը կլինի պայթյունավտանգ առանց այդ էլ խիստ լարված մեր տարածաշրջանում:
Հասմիկ Հարությունյան