Միջսիրիական հերթական հանդիպումը Մոսկվայում կարող է անցկացվել փետրվարի վերջին
ԱՐԽԻՎՍիրիայի կառավարության և ընդդիմության ներկայացուցիչների հերթական հանդիպումը Մոսկվայում կարող է անցկացվել փետրվարի վերջին: Այդ մասին, ինչպես տեղեկացնում է «Արմենպրես»-ը՝ հղում անելով ՏԱՍՍ-ին, հունվարի 30-ին Մոսկվայում կայացած մամուլի ասուլիսում հայտնել է ընդդիմադիր Հանուն վերափոխումների և ազատագրման ժողովրդական ճակատի առաջնորդ Կադրի Ջամիլը:
«Համաձայնություն է ձեռք բերվել՝ հանձնարարել ռուսական կողմին, մասնավորապես, Արևելագիտության ինստիտուտին, աշխատանք տանել երկրորդ հանդիպումը նախապատրաստելու համար, որը պետք է կայանա մոտավորապես մեկ ամսից, և հանձնարարել նրան՝ մշակել հանդիպման օրակարգը»,- ասել է նա:
«Սիրիայի ժողովրդավարական ամբիոն» շարժման ներկայացուցիչ Սամիր Այիթան այն կարծիքին է, որ Դամասկոսի զինված ընդդիմախոսները պետք է Մոսկվայում մասնակցեն միջսիրիական կոնսուլտացիաներին: «Հանդիպմանը պետք է մասնակցեն բոլոր քաղաքական կազմակերպությունները, քաղաքացիական հասարակության բոլոր ներկայացուցիչները և նրանք, ովքեր զինված պայքար են մղում»,- ասել է Այիթան: