Էլբա կղզում նշում են Նապոլեոնի փախուստի 200-ամյակը
Գիտություն և ՄշակույթԻտալիայում փետրվարի 26-ին նշվում է Էլբա կղզու գերությունից Նապոլեոն Ա Բոնապարտ կայսեր փախուստի օրվա 200-ամյակը: Ինչպես տեղեկացնում է «Արմենպրես»-ը, այս օրվա առթիվ կղզու Պորտոֆեռայո գլխավոր նավահանգստում կազմակերպվում են զգեստավորված բեմականացումներ, կղզու գրեթե ամբողջ բնակչության օգնությամբ վերականգնվում է Նապոլեոնի փախուստի տեսարանը, քաղաքի թատրոնում տեղի է ունենում գալա-համերգ:
Միջերկրական ծովի այս կղզում Բոնապարտի հարկադրական մնալուն նվիրված ակցիաների ընդարձակ ծրագիրը հաջողությամբ կատարված է, նշում են տեղական իշխանությունները: Մի քանի ցուցահանդեսներ պատմում են երկդարյա վաղեմության գլխավոր իրադարձությունների մասին:
Բոնապարտը կղզի է աքսորվել 1814 թվականին՝ Ֆոնտենբլոյի պայմանագրի կնքումից հետո: Կայսերը թույլատրել են պահել անձնական պահակախումբ՝ բաղկացած վեց հարյուր գվարդիականներից և կրել Կղզու կայսեր տիտղոսը: Նրա տնօրինության տակ եղել է երեք հարյուր քառակուսի կիլոմետր տարածք՝ երեք ոչ մեծ քաղաքներով, այդ «առողջարանային թագավորության» բնակչությունը կազմել է 12 հազար մարդ:
Թեև նա անվանապես եղել է Էլբայի գերիշխանը, կղզին վերահսկվել է բրիտանական ռազմածովային պարեկների կողմից: Այդ ամիսների ընթացքում Նապոլեոնը նույնիսկ կղզում իրականացրել է մի շարք տնտեսական և սոցիալական բարեփոխումներ: Ընդամենը կայսրն Էլբայում է գտնվել 9 ամիս և 21 օր. այստեղ ճիշտ այդքան կտևեն հոբելյանական տոնակատարությունները, հաղորդել է ՏԱՍՍ-ը: