Աբաշիձե-Կարասին բանակցությունների ձևաչափը չի փոփոխվի. Վրաստանի ԱԳՆ
ԱՐԽԻՎՎրաստանի կառավարությունը չի պլանավորում փոխել հանրապետության վարչապետի՝ ՌԴ-ի հետ հարաբերությունների կարգավորման հարցերով հատուկ ներկայացուցիչ Զուրաբ Աբաշիձեի և Ռուսաստանի արտաքին գործերի փոխնախարար Գրիգորի Կարասինի հանդիպումների ձևաչափը: Այդ մասին, ինչպես տեղեկացնում է «Արմենպրես»-ը, հղում անելով «Նովոստի Գրուզիա»-ին, հայտարարել է Վրաստանի ԱԳ նախարար Թամար Բերուչաշվիլին:
«Այդ մանդատը կպահպանվի այն տեսքով, որով նա գոյություն ունի: Աբաշիձե-Կարասին բանակցություններում ոչ մի նորամուծություն նախատեսված չէ»,- ասել է Բերուչաշվիլին:
Աբաշիձեի և Կարասինի միջև բանակցությունների վերջին փուլը փետրվարի 26-ին կայացել է Պրահայում: Դրա ընթացքում կողմերը կարողացել են պայմանավորվել Վրաստանի և ՌԴ-ի սահմանում ապրանքաշրջանառության մոնիթորինգի գծով շվեյցարական ընկերության հետ պարտավորագրեր ստորագրելու շուրջ:
Ներկայումս Ռուսաստանը Վրաստանի գլխավոր առևտրական գործընկերների հնգյակում է՝ նրա արտահանման մեջ զբաղեցնելով չորրորդ տեղը, իսկ ներմուծման մեջ՝ հինգերորդ տեղը: «Մենք Ռուսաստան ենք արտահանում մոտավորապես 200 մլն դոլարի ապրանքներ, իսկ ներմուծում ենք 300 միլիոնի,- ասել է Աբաշիձեն:- Իսկ գինու և հանքային ջրերի գծով Ռուսաստանը մեր գլխավոր ներմուծողն է»: