Մարտի 3-ին նշվում է Վայրի բնության համաշխարհային օրը
ՀասարակությունՄարտի 3-ը Վայրի բնության համաշխարհային օրն է: Նշվում է 2014 թվականից: Հռչակվել է 2013 թվականի դեկտեմբերի 20-ին Միավորված ազգերի կազմակերպության (ՄԱԿ) 68-րդ նստաշրջանում (բանաձև 68/205, ընդունվել է առանց քվեարկության), տեղեկացնում է «Արմենպրես»-ը:
ՄԱԿ-ը պաշտպանել է Վայրի բնության օր սահմանելու բանաձևը, որն ընդունվել է 2013 թվականի մարտի 3-14-ը Բանգկոկում ՍԻՏԵՍ-ի (անգլ. The Convention on International Trade in Endangered Species of Wild Fauna and Flora-Վայրի կենդանական և բուսական աշխարհի՝ ոչնչացման սպառնալիքի տակ գտնվող տեսակների միջազգային առևտրի մասին կոնվենցիա) կողմերի խորհրդաժողովի 16-րդ նստաշրջանում: Բանաձևի նախագիծը ՄԱԿ-ի Գլխավոր ասամբլեայի քննարկմանն է ներկայացրել Թաիլանդի Թագավորությունը:
Վայրի բնության օրվա տոնակատարության օրը կապված է 1973 թվականի մարտի 3-ին Վաշինգտոնում 80 երկրի ներկայացուցիչների կողմից ՍԻՏԵՍ-ի կոնվենցիայի ստորագրման հետ (ուժի մեջ է մտել 1975 թվականի հուլիսի 1-ին): Այս միջազգային համաձայնագիրը պաշտպանում է կենդանիների շուրջ 5 հազար տեսակ և բույսերի 28 հազար տեսակ. կենդանական և բուսական աշխարհի այս ներկայացուցիչների ներումուծումը, արտահանումը, վերաարտահանումը և ինտրոդուկցիան պետք է կատարվեն հատուկ թույլտվությունների և հավաստագրերի հիման վրա: Ինչպես նշում է ՏԱՍՍ-ը, Կոնվենցիայի գործողության սկսվելուց ի վեր դրա պաշտպանության ներքո գտնվող ոչ մի տեսակ չի անհետացել:
Վայրի բնության համաշխարհային օրը կոչված է հիշեցնելու վայրի կենդանական և բուսական աշխարհի բազմազանության և գեղեցկության, ինչպես նաև դրանց նկատմամբ հոգատար վերաբերմունքի կարևորության և որսագողության դեմ պայքարի ուժեղացման անհրաժեշտության մասին: