Ռուսաստանի տնտեսական աճի դանդաղումը բացասաբար է ազդում ԱՊՀ-ի երկրների վրա. Fitch
ԱշխարհՌուսաստանի տնտեսական աճի տեմպերի դանդաղումը զգալի բացասական ազդեցություն է գործում ԱՊՀ-ի երկրների վրա: Այդ մասին, ինչպես տեղեկացնում է «Արմենպրես»-ը, ասված է Fitch միջազգային վարկանիշային գործակալության հաղորդագրության մեջ:
«Ռուսաստանի տնտեսական աճի տեմպերի կտրուկ դանդաղումը զգալի ցնցում է ԱՊՀ-ի մյուս պետությունների տնտեսության համար, բայց այդ երկրների վարկունակության վրա ազդեցությունն էականորեն տարբերվում է»,- հաղորդվում է գործակալության մամուլի տեղեկագրում:
Ռուսաստանի տնտեսական իրադրությունը անմիջական ազդեցություն է գործում ԱՊՀ-ի այն երկրների վրա, որոնց հետ ՌԴ-ն տնտեսական սերտ կապեր ունի առևտրի, դրամական փոխանցումների և ներդրումային հոսքերի առումով, բացատրում են վերլուծաբանները: «Անուղղակիորեն ռուբլու փոխարժեքի կտրուկ անկումը կարևոր գործոն դարձավ տարածաշրջանների արժույթների զգալի սրբագրումների համար»,- նշել է Fitch-ը: Ռուսական ռուբլու դևալվացիայի ազդեցությունն զգացել են նաև Ղազախստանն ու Ադրբեջանը: «Մենք գտնում ենք՝ բարձր է այն բանի հավանականությունը, որ Ղազախստանը նույնպես կարող է դևալվացնել ազգային արժույթը»,-նշվում է հաղորդագրության մեջ:
Ռուսաստանը Հայաստանի ապրանքների արտահանման հիմնական շուկան է և ուղղակի օտարերկրյա ներդրումների և հայկական կողմի դրամական փոխանցումների խոշորագույն աղբյուրը: Ուստի, ինչպես նշում են գործակալության վերլուծաբանները, Ռուսաստանի տնտեսական աճի տեմպերի դանդաղումը լուրջ ազդեցություն կունենա Հայաստանի տնտեսական աճի հեռանկարների վրա:
Fitch-ի տվյալներով՝ Ռուսաստանի տնտեսական իրադրության փոփոխություններին ամենաքիչը ենթարկված է Վրաստանը: «Թե Հայաստանը, թե Վրաստանը իրենց արժույթների լողացող փոխարժեք են սահմանել՝ դրանով իսկ ապահովելով արժութային պահուստների ամորտիզացիան և պահպանումը»,- հավելել են վերլուծաբանները:
Նրանք այն կարծիքին են, որ Ռուսաստանի հետ Ուկրաինայի սերտ տնտեսական կապերի խախտվելն Ուկրաինայի կտրուկ տնտեսական անկման պատճառ է դարձել: «Ուկրաինան ԱՊՀ-ի երկրորդ երկիրն է, որն առավել մեծ չափով է ենթարկված Ռուսաստանի տնտեսության տատանումներին՝ նույնիսկ առանց ընթացիկ հակամարտության ազդեցության և առևտրական սահմանափակումների հաշվառման»,- ասված է գործակալության հաղորդագրության մեջ: