Սիրիայում պատերազմը 20 տարով կրճատել է կյանքի տևողությունը. ՄԱԿ
Մերձավոր ԱրևելքՍիրիայում կյանքի միջին տևողությունը 20 տարով կրճատվել է երկրում շարունակվող հակամարտության պատճառով: Այդ մասին, ինչպես տեղեկացնում է «Արմենպրես»-ը, հայտարարել է ՄԱԿ-ի գլխավոր քարտուղարի հումանիտար հարցերով տեղակալ Վալերի Ամոսը:
«Այսօր Սիրիայում կյանքի տևողությունը 20 տարով պակաս է գնահատվում, քան մինչև հակամարտության սկսվելը: Գործազրկությունը կազմում է 58 տոկոս, ցուցանիշը 2010 թվականից աճել է 10 տոկոսով: Սիրիացիների շուրջ երկու երրորդը ապրում է կատարյալ աղքատության մեջ»,- հայտնել է Ամոսը՝ ելույթ ունենալով Անվտանգության խորհրդի՝ Սիրիայի հումանիտար իրադրությանը նվիրված նիստում:
Նա նշել է, որ 2139 բանաձևի (արտոնում է մուտքը Սիրիա' հումանիտար օգնություն ցուցաբերելու համար) ընդունումից մեկ տարի հետո և ճգնաժամի սկսվելու հինգերորդ տարում երկրում տիրող դաժանության մակարդակը ցնցող է: «Մենք բոլորս հուսով էինք, որ բանաձևը կողմերին կմղի նվազեցնելու բռնությունը և կբերի Սիրիայի ժողովրդի դրության զգալի բարելավման: Այնուամենայնիվ, Սիրիայի իրադրությունը աղետալիորեն վատացավ»,- ասել է նա:
Ամոսը հայտարարել է, որ եթե «չգտնվի Սիրիայի ճգնաժամի քաղաքական լուծում, միլիոնավոր մարդկանց կյանքն էլ ավելի կվատանա: Նրա խոսքով՝ Սիրիայի բնակիչները քաղաքներում և այլ բնակավայրերում արգելափակված վիճակում են հայտնվում ինչպես կառավարության, զինված խմբերի, այնպես էլ ահաբեկիչների կողմից: «Սիրիայում պաշարման մեջ հայտնված մարդկանց ընդհանուր թվաքանակը 212 հազարից ավելացել է մոտավորապես մինչև 440 հազար»,- հայտնել է Ամոսը:
Նա նաև տվյալներ է բերել այն մասին, որ Սիրիայում 5,6 մլն երեխաներ օգնության խիստ կարիք ունեն, երեխաների սնվելու մակարդակը կտրուկ իջել է: Երկրում ավերված է առողջապահության համակարգը, աշխատում է նախնական բուժօգնության հիմնարկների միայն կեսը: «Վերջին չորս տարվա ընթացքում 233 գրոհ է գրանցվել 183 բուժհաստատությունների վրա, սպանվել է բուժանձնակազմի 610 անդամ»,-հայտարարել է Ամոսը:
Նրա խոսքով՝ երկրի այն շրջաններում, որոնք հայտնվել են «Իսլամական պետության» հսկողության ներքո, փակվել են հումանիտար բոլոր գործակալությունների գրասենյակները, Պարենի համաշխարհային ծրագիրը հարկադրված է եղել կանգնեցնել 700 հազար մարդու համար նախատեսված օգնության տարածումը, հաղորդել է ՌԻԱ Նովոստին: