Լուբիցի արարքի դրդապատճառը կարող էր լինել թռիչքի թույլատրագիրը կորցնելու վախը
ԱշխարհՖրանսիայում կործանված Germanwings-ի ինքնաթիռի օդաչու Անդրեաս Լուբիցն առողջության հետ կապված խնդիրների պատճառով խուճապահար վախեցել է կորցնել աշխատանքը, ինչը կարող էր նրա արարքի դրդապատճառ դառնալ: Այդ մասին, ինչպես տեղեկացնում է «Արմենպրես»-ը, մարտի 31-ին գրել է Bild թերթը՝ վկայակոչելով քննիչներից մեկին:
Germanwings ավիաընկերության A320 ինքնաթիռը, որը Բարսելոնից ուղևորվում էր Դյուսելդորֆ, կործանվել է մարտի 24-ին Ֆրանսիայի հարավ - արևելքում՝ Ալպերի դժվարամատչելի շրջանում: Աղետի հետևանքով զոհվել է 150 մարդ: Միակ հայտնաբերված «սև արկղի» ձայնագրությունը ցույց է տալիս, որ աղետը դարձել է երկրորդ օդաչուի՝ Գերմանիայի քաղաքացի Լուբիցի դիտավորյալ գործողությունների հետևանքը:
«Մեզ համար գլխավոր դրդապատճառներից մեկն այժմ այն է, որ Լուբիցը, հավանաբար, վախեցել է բժշկական խնդիրների պատճառով կորցնել թռչելու հնարավորությունը»,- ասել է նա հրատարակությանը:
Լուբիցը, ինչպես ավելի վաղ հայտնել է Դյուսելդորֆի դատախազությունը, միաժամանակ հսկվել է մի քանի հոգեբույժների կողմից, միայն Դյուսելդորֆի համալսարանական կլինկայում 2015 թվականի փետրվարից մինչև մարտի 10-ը նա եղել է առնվազն երեք անգամ: Հրատարակության տեղեկատվությամբ՝ օդաչուն ցանկացել է արձակուրդ գնալ, բայց չի ցանկացել հիվանդության թերթիկ վերցնել, որովհետև վախեցել է, թե դա կխանգարի իր աշխատանքին, հաղորդել է ՌԻԱ Նովոստին: