«Ուզում ենք, որ Հայաստանի թիմը լավագույնը ճանաչվի, բայց թող հաղթի ուժեղագույնը». Սմբատ Լպուտյան
ՍպորտՇախմատի Հայաստանի ֆեդերացիայի փոխնախագահ Սմբատ Լպուտյանի կարծիքով՝ Հայաստանն աշխարհի թիմային առաջնությունում հյուրընկալելու և առաջնությունը մեծ շուքով անցկացնելու համար արել է ամեն ինչ:
«Նմանատիպ մրցաշարերը յուրաքանչյուր երկրի համար շատ կարևոր են, քանի որ աշխարհի շախմատի թիմային առաջնությունը իր հզորությամբ երկրորդն է Օլիմպիադայից հետո: Խաղում են աշխարհի տասը ուժեղագույն թիմերը, որոնք ընտրվում են օլիմպիդայի և մայրցամաքներում չեմպիոններ լինելով: Այդ պատճառով էլ ամենուժեղ թիմերն են իրավունք ձեռք բերում մասնակցել աշխարհի շախմատի թիմային առաջնությանը: Այս ուժեղագույն թիմերի ժամանակումը մրցավայր՝ տվյալ պարագայում Հայաստան, չի կարող չանդրադառնալ այդ երկրում շախմատ մարզաձևի զարգացմանը կամ ճանաչմանը, էլ չեմ ասում, թե նման միջոցառումներ հյուրաընկելով՝ երկիրը որքան ճանաչելի է դառնում»,- «Արմենպրես»-ի հաղորդմամբ, լրագրողների հետ զրույցում նշեց Լպուտյանը:
Նրա խոսքով՝ կան շատ ուժեղ թիմեր՝ Ռուսաստան, Ուկրաինա, Չինաստան: «Տղաների տրամադրությունը շատ լավն է: Ես նրանց մեջ տեսնում եմ բավական մեծ էներգիա, որը շատ կարևոր է շախմատիստի համար: Մեկ-երկու խաղից հետո նոր ավելի վստահ կարող ենք խոսել, թե ինչ մարզավիճակում են մեր տղաները: Կարևորը՝ տրամադրվածությունը մարտական է»,-ասաց նա:
«Ցանկանում եմ, որ առաջնությունը ստեղծագործական լինի, հենց դա են ուզում տեսնել շախմատասերները: Մենք ուզում ենք, որ Հայաստանի թիմը լավագույնը ճանաչվի, բայց թող հաղթի ուժեղագույնը»,- եզրափակեց Լպուտյանը:
Այս առաջնությունը հոբելյանական է: Առաջին անգամ աշխարհի թիմային առաջնությունների պատմության ընթացքում մեկնարկող 50 շախմատիստներից 49-ը կրում են գրոսմայստերի կոչում: Այս ցուցանիշ եզակի է շախմատային մրցաշարերի տարեգրության մեջ: Հայաստանն այն երկիրն է, որին արդեն երկրորդ անգամն է, որ բախտ է վիճակվում կազմակերպելու աշխարհային թիմային առաջնությունը: Հայաստանը մինչ այժմ մեկ անգամ հռչակվել է աշխարհի թիմային առաջնության չեմպիոն, երեք անգամ՝ բրոնզե մեդալակիր: