Սիցիլիական նեղուցում խորտակված նավի վրա կարող էր լինել շուրջ 950 մարդ
ԱշխարհՍիցիլիական նեղուցում լույս ապրիլի 19-ի գիշերը խորտակված նավի վրա կարող էր լինել շուրջ 950 մարդ, այդ թվում՝ 40-50 երեխա և 200 կին: Այդ մասին Իտալիայի Կատանիա քաղաքի (Սիցիլիա կղզի) դատախազությունում հայտարարել է փրկվածներից մեկը՝ Բանգլադեշի քաղաքացին, հաղորդում է ՏԱՍՍ-ը:
Ավելի վաղ հաղորդվել է, որ ողբերգությունը տեղի է ունեցել Իտալիայի Լամպեդուզա քաղաքից 200 կիլոմետր հարավ ընկած շրջանում:
Փրկվածի խոսքով՝ ձկնորսական նավը մեկնել էր Լիբիայի Տրիպոլի նավահանգստից: Դրա վրա եղել են Ալժիրի, Եգիպտոսի, Սոմալիի, Նիգերիայի, Սենեգալի, Մալիի, Զամբիայի, Բանգլադեշի և Գանայի բնակիչներ:
Առայժմ փրկարարա-որոնողական գործողության մասնակիցներին հաջողվել է հայտնաբերել 24 զոհվածի մարմին, ևս 28-ին հաջողվել է փրկել: Ավելի վաղ հաղորդվել էր անհայտ կորած ավելի քան 700 անօրինական գաղթականների մասին:
Ինչպես հայտնել է Իտալիայի վարչապետ Մատեո Ռենցին, որոնողական գործողությանը մասնակցում է 18 նավ, ներառյալ Իտալիայի ռազմածովային ուժերի յոթ նավ: Բացի այդ, որոնումներում ներգրավված են երեք ուղղաթիռ և առափնյա պահպանության ծառայության թեթև ինքնաթիռ: