Եվրահանձնաժողովն Ադրբեջանին և Թուրքմենստանին կոչ է արել վերածնել Անդրկասպյան գազատարի կառուցումը
ԱշխարհԵվրահանձնաժողովն Ադրբեջանին և Թուրքմենստանին առաջարկել է նորացնել Անդրկասպյան գազատարի կառուցման գծով փոխըմբռնման մասին հուշագիրը:
Այս մասին, ինչպես հաղորդում է «Արմենպրես»-ը, հայտարարել է Եվրահանձնաժողովի Էներգետիկական միության գծով փոխնախագահ Մարոշ Շեֆչովիչը' «Կոմերսանտ»-ին տված հարցազրույցում:
«2011 թվականից Եվրահանձնաժողովը մանդատ ունի Անդրկասպյան գազատարի կառուցման գծով Թուրքմենստանի և Ադրբեջանի հետ փոխըմբռնման մասին հուշագրի շրջանակում բանակցություններ անցկացնելու համար: Այժմ մենք Ադրբեջանին և Թուրքմենստանին առաջարկել ենք նորացնել այդ հուշագիրը, սպասում ենք պատասխանի և տեսնենք, թե ինչպես կանցնեն բանակցությունները»,- ասել է նա:
Շևչովիչը նշել է, որ Հարավային գազային միջանցքի նախագծի շրջանակում կարելի է գազի մատակարարումներ ակնկալել նաև Իրաքից և Իրանից' հաշվի առնելով վերջին դիվանագիտական բեկումը Իրանի միջուկային ծրագրի շուրջ:
Անդրկասպյան գազատարով նախատեսվում է Թուրքմենստանի արևելյան հանքավայրերից գազի փոխադրում' Թուրքիայով դեպի Եվրոպա:
Հետաքրքիր է, որ Բրյուսելի այդ առաջարկն Ադրբեջանում որպես սադրանք են բնութագրել: Մասնավորապես, իշխանամետ virtualaz. org կայքը գրել է, որ այդ առաջարկով Բրյուսելն Ադրբեջանին սադրանքի մեջ է ներքաշում, որպեսզի կրկնի Ուկրաինայի ճակատագիրը:
«Այն դեպքում, երբ ստեղծված իրավիճակում Ռուսաստանը դադարեցրել է «Հարավային հոսք» գազատարի նախագիծը և գործի դրել ադրբեջանական գազը Եվրոպա փոխադրելու երթուղին կրկնող «Թուրքական հոսք» նախագիծը, իսկ Հունաստանի կառավարությունն էլ խոչընդոտներ է հարուցում ադրբեջանական գազը Եվրոպայի հարավ հասցնելու Անդրադրիատիկ գազատարի նախագծի իրագործմանը, Բրյուսելը Ադրբեջանին և Թուրքմենստանին ներքաշում է ռիսկային նախագծի' նույնիսկ ավանտյուրայի մեջ»,- գրել է կայքը: