Վաղ թե ուշ Թուրքիան ներողություն կխնդրի. Ջիվան Գասպարյան
ՀասարակությունՀայ ազգն իր օտարերկրյա բարեկամների հետ պայքարում է արդարության համար: Ծիծեռանակաբերդի հուշահամալիրում լրագրողների հետ զրույցում նման տեսակետ արտահայտեց աշխարհահռչակ դուդուկահար Ջիվան Գասպարյանը: Նա կարծում է, որ ապրիլի 25-ին ու դրան հաջորդող օրերին հայերը պետք է շարունակեն աշխատանքը, որ մեծ թափով սկսել են: «Մեր պահանջները միշտ էլ նույնն են եղել, մենք արդարություն ենք ուզում, ճիշտն ենք ուզում: Չենք ուզում որևէ ազգի հետ ընդհարվել: Ուզում ենք մեզ համար խաղաղ ապրել, բայց խանգարողներ կան»,- «Արմենպրես»-ի փոխանցմամբ' ասաց երաժիշտը:
Ջիվան Գասպարյանի կարծիքով' վաղ թե ուշ Թուրքիան կհասկանա 100 տարի առաջվա գործած իր սխալները ու ներողություն կխնդրի: «Ես կարծում եմ, որ վաղ թե ուշ այդ հարցը կլուծվի, դա պետք է ժողովուրդներին»,-նշեց երաժիշտը' հավելելով, որ թուրք երիտասարդների մեջ կան մարդիկ, ովքեր գիտակից են ու ընդունում են իրենց պապերի սխալը: Ջիվան Գասպարյանը նշեց, որ համերգներ է ունեցել թե Անկարայում, թե Ստամբուլում ու գիտի, որ իր համերգները ստիպել են թուրքերին ծաղիկ խոնարհել անմեղ զոհերի հիշատակին:
Անդրադառնալով 100-րդ տարելիցի միջոցառումներին' Ջիվան Գասպարյանը նշեց, որ ահռելի աշխատանք է կատարվել: «Դա մեզ համար շատ լավ է, քիչ բան չէ, մեծ աշխատանք է կատարվել: Մեր երկրի ղեկավարությունը հրաշալի գործ է արել դրսի հետ միասին»,- ասաց վաստակավոր դուդուկահարը: