Հայաստանը դարձավ աշխարհում ցեղասպանությունների դեմ պայքարի միջազգային առաջատարը
ԱՐԽԻՎՀայաստանը դարձավ աշխարհում ցեղասպանությունների դեմ պայքարի միջազգային առաջատարը։ «Հայոց ցեղասպանության 100-րդ տարելիցի միջոցառումները վերածելով քաղաքական գործոնի՝ մենք նոր պատասխանատվություն ստանձնեցինք՝ դառնալով աշխարհում ցեղասպանությունների դեմ պայքարի և նմանատիպ հանցագործությունների կանխարգելմանն ուղղված շարժման ղեկավարը։ «Արմենպրես»-ի հաղորդմամբ՝ լրագրողների հետ ապրիլի 27-ին կայացած հանդիպմանն այսպիսի կարծիք հայտնեց քաղաքագետ Հրանտ Մելիք-Շահնազարյանը։
Նա նշեց, որ Հայաստանի համար երկրորդ կարևոր ձեռքբերումը նոր անվտանգության գործոնի ստեղծումն է։ «Ներկա դրությամբ՝ Թուրքիան բավական լուրջ սահմանափակված է իր գործողություններում, և թուրքական իշխանություններին դեռ երկար ժամանակ կպահանջվի թոթափելու Հայոց ցեղասպանության 100-րդ տարելիցի հետ կապված իր գլխին թափված միջազգային ճնշումներից։ Բացի այդ՝ Ադրբեջանը նույնպես տեսավ, որ Հայաստանը իր անվտանգության առումով միայնակ չէ աշխարհում և դրանով իսկ ադրբեջանական իշխանությունների կողմից պատերազմի սանձազերծման հավանականությունը գրեթե հավասարվեց զրոյի»,- նկատեց Մելիք-Շահնազարյանը և հավելեց, որ Թուրքիան ամեն կերպ փորձելու է պայքարել հայկական գործոնի թուլացման համար, քանի որ ցանկալի արդյունք չստացավ Գալիպոլիում կազմակերպած միջոցառումից։
Անդրադառնալով Գերմանիայի կողմից Հայոց ցեղասպանությունը ճանաչելուն ուղղված քայլերին՝ քաղաքագետը շեշտեց հետևյալը. «Գերմանիան փորձում է ձերբազատվել առաջին ցեղասպանագործի կարգավիճակից, քանի որ ժամանակին հենց իր թողտվության պատճառով երիտթուրքերն իրականացրին Հայոց ցեղասպանությունը։ Բացի այդ՝ մենք չպետք է մոռանանք, որ Գերմանիան և Ֆրանսիան իրենց գործողություններով փորձում են հասկացնել թուրքական իշխանություններին, որտեղ չունեն համաեվրոպական ընտանիքում. Եվրամիության կազմում Թուրքիային ցանկանում է տեսնել միայն Ամերիկայի Միացյալ Նահանգները՝ ի հակակշիռ վերը նշված երկրների»,- պարզաբանեց Հրանտ Մելիք-Շահնազարյանը։
Հայոց ցեղասպանության 100-րդ տարելիցի միջոցառումների շրջանակում ապրիլի 22-24-ը Հայաստանում և աշխարհում իրականացվեցին քաղաքական, մշակութային, կրթական, գիտական միջոցառումներ, որոնք շեշտեցին մարդկության դեմ ուղղված ոճրագործության' Հայոց ցեղասպանության դատապարտման կարևորությունը: Ապրիլի 22-23-ին աշխարհի տարբեր երկրներից 600 պատվիրակ Երևանում մասնակցեցին «Ընդդեմ ցեղասպանություն հանցագործությա ն» գլոբալ ֆորումին: Ապրիլի 23-ին համայն հայության սրբավայր Մայր Աթոռում իրականացվեց Հայոց ցեղասպանության' հավատքի ու հայրենիքի համար նահատակված զոհերի սրբադասման կարգը, նույն օրը երեկոյան Հանրապետության հրապարկում «Արթնացրեք հոգիները» համերգաշարով հանդես եկավ աշխարհահռչակ System of a down ռոք խումբը: Ապրիլի 24-ին Ծիծեռնակարբերդի բարձունքում «Հիշում եմ և պահանջում» խորագրով միջոցառմանը մասնակցեցին 60 երկրների պատվիրակություններ, Ռուսաստանի, Ֆրանսիայի, Սերբիայի ու Կիպրոսի նախագահները: Այդ օրը երեկոյան տեղի ունեցավ «Վերածնունդ» դասական համերգը, ինչպես նաև ավանդական դարձած ջահերով երթը դեպի Ծիծեռնակաբերդ: