Ֆրանսիայում կատարվել է արհեստական սրտի փոխպատվաստման երրորդ վիրահատությունը
ԱշխարհՖրանսիացի բժիշկները կարողացել են փոխպատվաստել համաշխարհային պատմության մեջ երրորդ ինքնավար արհեստական սիրտը: Այդ մասին, ինչպես տեղեկացնում է «Արմենպրես»-ը, հաղորդել է Liberation թերթը՝ վկայակոչելով անունները չհայտնած աղբյուրներ:
Վիրահատությունը, ինչպես նաև պատմության մեջ առաջին՝ արհեստական սրտի փոխպատվաստումը տեղի է ունեցել Փարիզի Ժորժ Պոմպիդուի եվրոպական հոսպիտալում՝ խստագույն գաղտնիության պայմաններում:
«Միջամտությունն անցել է լավ, բայց հետվիրահատական շրջանը հեշտ չի եղել»,-գրել է թերթը:
Ինչպես նշում է ՌԻԱ Նովոստին, լիակատար ինքնավար արհեստական սրտի փոխպատվաստման՝ աշխարհում առաջին վիրահատությունը կատարվել է 2013 թվականի դեկտեմբերի կեսերին: Սակայն 76-ամյա տղամարդը, որին փոխպատվաստվել էր բացառիկ կենսապրոթեզը, 2,5 ամիս անց մահացել է մեխանիզմի աշխատանքի խափանման պատճառով:
2014 թվականի ամռանը 900 գրամ քաշով արհեստական սիրտը (եռակի գերազանցում է մարդու սովորական սրտի զանգվածը) փոխպատվաստվել է 68 տարեկան հիվանդի, որը տառապում էր ավելորդ քաշից: Շուրջ կես տարի անց տղամարդը կարողացել է վերադառնալ սովորական կյանքի և նույնիսկ սկսել է հեծանիվ վարել: